QR Premer-Ministri Asqar Mamin Memleket basshysynyń tapsyrmasy boiynsha Qyzylorda oblysy máslihatynyń kezekten tys otyrysyna qatysty. Onda ol QR Prezidenti Qasym-Jomart Toqaevtyń Qýanyshbek Ysqaqovty óńir ákimi laýazymyna taǵaiyndaý týraly usynysy jazylǵan hatty oqyp berdi, dep habarlaidy "Ult aqparat".
Daýys berý qorytyndysy boiynsha, máslihat depýtattary QR Prezidenti usynǵan kandidatýrany biraýyzdan qoldady. Qyzylorda oblysynyń aktivimen kezdesýde QR Úkimetiniń basshysy Q. Kósherbaevqa óńirdi damytý boiynsha atqarǵan eleýli jumysy úshin alǵys aityp, jańa laýazymy - QR Prezidenti Ákimshiliginiń basshysy qyzmetinde sáttilik tiledi.
«Qyrymbek Kósherbaev Qyzylorda oblysyn 6 jyl boiy basqardy, óńirdiń áleýmettik-ekonomikalyq damýyna úlken úlesin qosty. Osy ýaqyt ishinde iri infraqurylymdyq jáne ónerkásiptik jobalar iske asyryldy. Áleýmettik salany damytý boiynsha tiimdi sharalar qabyldandy», - dedi A. Mamin.
Qyzylorda oblysynyń aktivine óńirdiń jańa ákimin tanystyra otyryp, Asqar Mamin Qýanyshbek Ysqaqovtyń óńirlik jáne ortalyq deńgeidegi eleýli jumys tájiribesin atap ótti: 2015 jyldan bastap Qyzylorda oblysy ákiminiń orynbasary laýazymyn atqardy, uzaq jyldar boiy QR Qarjy ministrliginiń júiesinde jumys istedi.
QR Premer-Ministri Asqar Mamin Qyzylorda oblysynyń aldynda QR Tuńǵysh Prezidenti - Elbasy Nursultan Nazarbaevtyń halyqtyń turmys sapasyn arttyrý jáne Memleket basshysy Qasym-Jomart Toqaevtyń qolda bar áleýetti iske asyrý arqyly turaqty ekonomikalyq ósimdi qamtamasyz etý boiynsha mindetter turǵanyn atap ótti. Jańa ákimge óńir aktivimen jáne máslihat depýtattarymen birlesip, alǵa qoiylǵan maqsattarǵa qol jetkizý úshin barlyq kúsh-jigerdi jumyldyrý tapsyryldy.
