QR Premer-Ministri Asqar Mamin Qazaqstanǵa memlekettik saparmen kelgen Qyrǵyz Respýblikasynyń Prezidenti Sadyr Japarovpen kezdesti, dep habarlaidy "Ult aqparat" primeminister.kz-ke silteme jasap.
Úkimet basshysy Sadyr Japarovtyń Qazaqstanǵa sapary Qazaqstan – Qyrǵyzstan strategiialyq yntymaqtastyǵyn odan ári nyǵaitýǵa jańa serpin beretinine senim bildirdi.
«Búgin joǵary deńgeide mańyzdy ýaǵdalastyqtarǵa qol jetkizildi. Qazaqstan Úkimeti barlyq máselelerdi sheshý, sondai-aq ózara qyzyǵýshylyq týdyratyn jańa bastamalardy ázirlep, iske asyrý boiynsha qyrǵyz áriptesterimen syndarly birlesken jumys júrgizýge nietti», — dedi A. Mamin.
Taraptar saýda-ekonomikalyq, investitsiialyq, sý-energetikalyq, tranzittik-kólik jáne shekara mańy yntymaqtastyǵynyń ózekti máselelerin, sondai-aq COVID-19-ǵa qarsy kúres aiasyndaǵy birlesken sharalardy talqylady.
Ónerkásipte, aýyl sharýashylyǵynda, bilim berý men týrizmde ózara is-qimyldy odan ári keńeitý úshin úlken áleýettiń bar ekeni atap ótildi. Sondai-aq EAEO jáne basqa da integratsiialyq birlestikter sheńberindegi ózara is-qimyl máseleleri qaraldy.
Qazaqstan Qyrǵyzstan ekonomikasynyń iri investorlarynyń qataryna kiredi. 2005 jyldan bastap Qazaqstannan Qyrǵyzstanǵa tikelei investitsiialardyń jinaqtalǵan kólemi shamamen $1 mlrd quraidy, QR-da shamamen 1,5 myń qyrǵyz kompaniiasy jumys isteidi.
2020 jyly ekijaqty taýar ainalymy $796,2 mln. Taraptar bul kórsetkishti $1 mlrd-qa deiin jetkizýge jáne satylatyn taýarlar men qyzmetter nomenklatýrasyn keńeitýge nietti.
Ekonomikalyq yntymaqtastyqty jandandyrý maqsatynda jaqynda úkimetaralyq keńestiń kezekti otyrysyn ótkizý josparlanyp otyr.
