Búgin Úkimet úiinde Qazaqstan Respýblikasynyń Premer-Ministri Asqar Mamin Qazaqstandaǵy Resei Federatsiiasynyń Tótenshe jáne Ókiletti elshisi Alekei Borodavkindi qabyldady, dep habarlaidy primeminister.kz.
Kezdesý barysynda elderdiń ekijaqty saýda-ekonomikalyq yntymaqtastyǵyna qatysty máseleler talqylandy. Astanada biyl mamyr aiynda EAEO mereitoilyq sammitin, kúzde Ombyda Qazaqstan men Reseidiń XVI aimaqaralyq yntymaqtastyq forýmyn ótkizý josparlaryna kóńil bólindi. Budan ózge, «Baiqońyr» kesheni boiynsha ózara is-qimyldyń birlesken ádis-tásilderi, sonyń ishinde Baiqońyr qalasynyń infraqurylymyn jańǵyrtý, «Báiterek» jobasyn iske asyrý máseleleri qaraldy.
Búginde EAEO barlyq elderi QR Prezidenti N. Nazarbaevtyń Eýraziialyq integratsiia týraly ideiasyna 25 jyl jáne Eýraziialyq ekonomikalyq odaq týraly kelisimshartqa qol qoiylǵanyna 5 jyl tolýyna orailastyrylǵan, Astanada EAEO mereitoilyq sammitin ótkizý ýaqytynyń tiimdiligin quptady.
Ombyda ótetin Qazaqstan men Reseidiń XVI aimaqaralyq yntymaqtastyq forýmy aiasynda Resei tarapy shekara mańy óńirleriniń Jastar forýmyn ótkizýge usynys bildirdi.
A. Borodavkinniń aitýynsha, 2018 jyl ekijaqty Qazaqstan-Resei qarym-qatynasy úshin tabysty ári jemisti boldy.
QR Premer-Ministri A. Mamin Reseidiń Qazaqstannyń basty saýda seriktesi ekenin jáne eki el arasyndaǵy yntymaqtastyqtyń qarqyndy túrde jáne barlyq baǵyttarda ilgerilemeli damyp kele jatqanyn atap ótti.
Resei úlesi Qazaqstannyń syrtqy saýda ainalymynda shamamen 19% quraidy, qazaqstandyq ónimdi eksporttaý boiynsha 4-orynda. 2018 jyldyń qorytyndysy boiynsha taýar ainalymy 2017 jylmen salystyrǵanda 7,2% ulǵaiyp, $17,6 mlrd qurady, sonyń ishinde eksport - $5,2 mlrd (+11,3%). 2017 jyldyń qorytyndysy boiynsha taýar ainalymynyń ósimi 25,6% quraǵan.
Investitsiialyq ózara is-qimyldyń joǵary deńgeii saqtalǵan. QR Ulttyq bankiniń derekteri boiynsha, 2005 jyldan bastap 2018 jylǵy III toqsan aralyǵynda Reseiden Qazaqstanǵa jinaqtalǵan tikelei investitsiialar kólemi $12,9 mlrd qurady. Qazaqstanda Resei kapitalynyń qatysýymen 6 myńnan astam kásiporyn tirkelgen, bul QR-daǵy sheteldik kapitaldyń qatysýymen jumys isteitin kásiporyndardyń jalpy sanynyń úshten birine jýyq (37%).
