QR Premer-Ministriniń birinshi orynbasary Asqar Mamin bastaǵan top is-saparmen Túrkistan oblysyna keldi. Aimaq basshysy Janseiit Túimebaevpen qazaq-ózbek shekarasyndaǵy keden beketterin aralap kórdi, dep habarlaidy "Ult aqparat".
Astanalyq qonaqtar shekara boiyndaǵy «Jibek joly» baqylap ótkizý beketiniń jumysymen tanysty. Sodan keiin qazaqstandyq delegatsiia Ózbekstan Respýblikasy Premer-Ministriniń birinshi orynbasary Achilbai Ramatov bastaǵan delegatsiiamen kezdesti. Taraptar júkterdi óńdeý ýaqyty men azamattardyń shekaradan ótý protsesin ońtailandyrý jáne eki el arasyndaǵy ózara tiimdi saýda - ekonomikalyq taýar ainalymyn arttyrý múmkindigin qarastyrý jaiyn talqylady.
Aita keteiik, eki el arasyndaǵy ekonomikalyq áriptestik qarym - qatynas ýaqyt ótken saiyn nyǵaiyp keledi. Sondai-aq, shekaradaǵy alys - beris, barys -kelistiń de kórsetkishi ulǵaia túsken. Máselen, 2017 jyldyń 5 aiynda «Jibek joly» baqylap ótkizý beketinnen 2,4 millionnan astam jeke tulǵa shekara assa, biylǵy jyldyń sáikes kezeńinde kórsetkish 4,2 millionǵa jetken.
Al, ótken jyly 9277 jeńil avtokólik ótken bolsa, aǵymdaǵy jyly 34915-ke jýyqtaǵan. Odan bólek, jyl basynan beri jolaýshylar tasymalymen ainalysatyn baǵyttar iske qosylyp, nátijesinde 1283 avtobýs Qazaqstan aýmaǵyna kelip ketken.
