2020 jyly «Eńbek» baǵdarlamasyna 649 myń adam qatysty. Bul týraly Májilis depýtattarynyń saýalyna QR Premer-Ministri Asqar Maminniń jaýabynda aitylǵan, dep habarlaidy "Ult aqparat".
«Búgingi kúni halyqtyń tabysyn qamtamasyz etý maqsatynda Halyqty jumyspen qamtý ortalyqtary «Eńbek» 2017-2021 jyldarǵa arnalǵan Ónimdi jumysen qamtý jáne jappai kásipkerlikti damytý memlekettik baǵdarlamasy aiasynda qysqa merzimdi oqytýdy qamtamasyz etý, qaitarymsyz granttar berý, kásipkerlik negizderine oqytý, sýbsidiialanatyn jumys oryndaryna jiberý jáne jumys kúshi tapshy óńirlerge erikti túrde qonys aýdarýǵa járdemdesý arqyly jumyspen qamtýǵa kómektesý is-sharalaryn kórsetedi. Aita keterligi, «Eńbek» memlekettik baǵdarlamasy aiasynda halyqtyń tabysyn arttyrý úshin az qamtylǵan jáne kópbalaly otbasylardyń múshelerinde jańa biznes-ideialardy júzege asyrýǵa 200 AEK mólsherinde qaitarymsyz grant alýǵa basym quqyq berilgen», - dedi Úkimet basshysy.
Bul rette, onyń aitýynsha, «Eńbek» memlekettik baǵdarlamasy aiasynda memlekettik granttar berý úshin qatysýshydan qosymsha qarjy jinaǵy talap etilmeidi. Sonymen qatar kásipkerlikti endi bastaǵandar jáne biznesin júrgizip júrgen tulǵalardyń qyzmetin keńeitý maqsatynda atalǵan baǵdarlama aiasynda jeńildetilgen sharttarmen shaǵyn nesieler beriledi.
«2020 jyly «Eńbek» baǵdarlamasyna 649 myń adam qatysty. Koronavirýs infektsisynyń taralýyna bailanysty elde karantin is-sharalaryn engizý Qazaqstannyń eńbek naryǵy úshin eń úlken syn-tegeýrin bolǵanyn atap ótken jón. Osyǵan bailanysty ótken jyly Úkimet barlyq resýrsy men múmkindigin jumyldyryp, barlyq memlekettik baǵdarlama áleýetin iske qosty. Onyń ishinde «Jumyspen qamtýdyń jol kartasy» jańa daǵdarysqa qarsy baǵdarlama qabyldanyp, qosymsha qarjylandyrý arqyly «Eńbek» baǵdarlamasynyń áleýeti keńeitildi. Jol kartasy aiasynda 2020 jyly 239 myń adam jumysqa ornalasty. Tolyqtai alǵanda, memlekettik sharalar 2020 jyly jumyssyzdyq deńgeiin 5 paiyz deńgeiinde ustap túrýǵa múmkindik berdi», - dedi Asqar Mamin.
