QR Premer-Ministri Asqar Maminniń tóraǵalyǵymen ótken Úkimet otyrysynda áleýmettik mańyzdy taýarlarǵa baǵalardyń turaqtylyǵyn qamtamasyz etý máseleleri qaraldy, dep habarlaidy "Ult aqparat".
QR saýda jáne integratsiia ministri B. Sultanov, QR ulttyq ekonomika ministri R. Dálenov, QR aýyl sharýashylyǵy ministri S. Omarov azyq-túlik taýarlarynyń qazirgi baǵalary, turaqtandyrý qorlarynyń qyzmeti jáne baǵalardyń ósýine jol bermeý boiynsha qabyldanyp jatqan sharalar týraly baiandady. Soltústik Qazaqstan oblysynyń ákimi Q. Aqsaqalov, Jambyl oblysynyń ákimi A. Myrzahmetov óńirlerdegi jumystar týraly baiandady.
Áleýmettik mańyzy bar azyq-túlik taýarlarynyń baǵalaryn turaqtandyrý jáne ustap turý, olardyń ósý sebepterin birtindep joiý maqsatynda osy jyldyń 16 tamyzynda kúshine engen sharalar kesheni ázirlendi. Olardyń ishinde — otandyq taýar óndirýshilerdiń taýarlardy barlyq saýda nysandaryna ornalastyra alý múmkindigi, áleýmettik mańyzy bar azyq-túlik taýarlaryna saýda ústemesin 15%-dan aspaityn mólsherde bekitý jáne jetkizýshilerden qosymsha aqy alýǵa tyiym salý, 4 negizgi taýarlyq pozitsiiaǵa (piiaz, kartop, sábiz, qyryqqabat) baǵanyń maýsymdyq ósýine jol bermeý. Sonymen qatar, óńirler kóterme-taratý saýda ortalyqtarynyń, saýda obektileriniń qurylysyn jáne naryqtardy jańǵyrtýdy qamtamasyz etedi.
QR Premer-Ministri Asqar Mamin Memleket basshysy Qasym-Jomart Toqaevtyń jaqynda Aqordada ótken keńeste áleýmettik mańyzy bar azyq-túlik taýarlaryna baǵany ustap turý máselesiniń mańyzdylyǵyn atap ótkenin aitty.
«Ákimder baǵa ósimine jol bermeý máselesin erekshe baqylaýda ustaýy qajet jáne kún saiyn monitoring júrgizip, jedel sharalardy qabyldaýy tiis», — dedi Asqar Mamin. Ákimdikterge áleýmettik mańyzy bar azyq-túlik taýarlaryna baǵany turaqtandyrý tetikterin iske asyrýdyń úlgilik óńirlik erejelerin bekitý jumystaryn jedeldetý jáne turaqtandyrý qorlarynda ónimderdi satyp alýǵa aldyn ala kirisý tapsyryldy. Satyp alýlar interventsiialaryn júzege asyrý úshin ÁKK shottary men depozitterinde 3,7 mlrd teńge bar.
Turaqtandyrý qorlary jumysynyń tiimdiligin odan ári arttyrý maqsatynda, QR Premer-Ministri atap ótkendei, turaqtandyrý qorlarynyń qyzmetine tekserý júrgizý, olardyń jumysyn qaita qurý jáne taýarlyq interventsiialar úshin satyp alýdy jedel júrgizý qajet. Sondai-aq, asa áleýmettik mańyzy bar 10 ónimdi shyǵarý baǵdarlamasyn ázirleý tapsyryldy. Bul baǵany ustap turýdyń mańyzdy faktory bolady.
Ministrler kabinetiniń basshysy QR Saýda jáne integratsiia ministrligine qysqa merzim ishinde biryńǵai onlain platformanyń ázirlenýin qamtamasyz etýdi tapsyrdy. Atalǵan júieniń kómegimen azamattar áleýmettik mańyzy bar azyq-túlik taýarlarynyń baǵalaryn óńirler men naqty dúkender turǵysynan onlain rejiminde qadaǵalap, sonymen qatar baǵa monitoringine tikelei qatysa alady.
