HH ǵasyrdyń otyzynshy jyldary qazaq dalasynda bolǵan asharshylyqtyń qupiiasyn ashyp, oǵan ádil baǵa berý jóninde qoǵam talaby jyldan jylǵa kúsheiip keledi. Osy rette tarih ǵylymdarynyń doktory, áriptesimiz Darhan Qydyráli búgin QazAqparat agenttigi arqyly jaqsy bir usynysty ortaǵa tastady. Men de bir aýyz pikir bildirsem deimin.
Birinshiden, asharshylyq jyldaryn «Alapat qasiret» kezeńi dep ataýdy qoldaimyn. Halqymyzdyń basynan ótken sol náýbetti biz osy ýaqytqa deiin birde asharshylyq, birde zulmat dep júrmiz. Asharshylyq sóziniń ózi – "golodomordyń" tikelei aýdarmasy. Al zulmat - keń uǵym. Mundai aýqymdaǵy náýbet álem halqynyń birazynyń basynan ótken.
Aqtaban kúide shubyryp, Syrdan ótip Alqakólge jetip qulaǵan qazaqtyń tarihyndaǵy aýyr qasirettiń biriniń «Aqtaban shubyryndy, Alqakól sulama» degen ataýmen tarihta qalǵany belgili. Mundai aýyr qasiretti halqymyz jadynan óshire almaidy.
Sovet biligi tusynda asharshylyq jaiynda aýyz ashýǵa tyiym salynǵandyqtan, ótken ǵasyrdaǵy náýbettiń naqty ataýy bolmady. Bul uly tragediia bolǵandyqtan biz qazaq dalasyndaǵy sol asharshylyq kezeńin - «Alapat qasiret» dep atasaq bolady.
Alapat qasirettiń bolǵanyn moiyndadyq, tarihy zerttelip jatyr. Sebebi halqymyzdyń basyna mundai qasirettiń ainalyp soqqanyn, bolshevikterdiń qanǵa boialǵan qyzyl ideologiiasynyń qaita oralǵanyn qalamaimyz! Alapat qasiret qaitalanbasyn!
Menińshe bul máselemen ǵalymdar ainalysý qajet. Kim kináli? Qansha adam qyryldy? Bul qoldan jasalǵan zulmatyn saiasi statýsy qandai? Naqty jaýapsyz suraqtar óte kóp.
Sol kezde ǵana «ALAPAT QASIRET» tarihi kezeńi resmi túrde naqty baǵasyn ala alady.
Asqar Omarov,
jýrnalist, zertteýshi
"Ult portaly"
