Foto: dknews.kz
Qyrǵyzstanda burynǵy prezident Asqar Aqaevtyń ústinen qozǵalǵan Qumtór kenishin igerýge bailanysty qylmystyq is toqtatyldy. Bul jóninde Qyrǵyzstan Bas prokýratýrasynyń baspasóz qyzmetine súiengen Azattyqtyń Qyrǵyz qyzmeti habarlady.
Vedomstvo ókilderiniń aitýynsha, is merzimi ótip ketýine bailanysty toqtaǵan.
"Asqar Aqaevqa qatysty qylmystyq qýdalaý adamdy qylmystyq jaýapkershilikke tartýdyń merzimi eskirgendikten toqtatyldy", - dedi Respýblika Bas prokýratýrasynyń Halyqaralyq-quqyqtyq yntymaqtastyq basqarmasynyń bastyǵy Asylbek Akmatov.
Aita keteiik, Asqar Aqaev 1991-2005 jyldary Qyrǵyzstan prezidenti bolǵan. 2005 jyly 24 naýryzda "qyzǵaldaq revoliýtsiiasy" kezinde Máskeýge qashqan. Keiin otstavkaǵa ketti.
2021 jyly Asqar Aqaev "Qumtór isi" boiynsha tergeý organdaryna jaýap berý úshin Qyrǵyzstanǵa eki ret ushyp keldi. UQMK sol kezde Aqaevqa 1992 jyly "Kameko" kompaniiasymen kelisim jasaý jáne 2003 jylǵy "Qumtórdi" qaita qurylymdaý máselesi boiynsha jańa aiyp taǵylǵanyn málimdegen. UQMK ókilderiniń aitýynsha, ol "joǵaryda aitylǵan qylmystardy jasaǵanyn tolyq moiyndap, tergeý organdarymen yntymaqtastyq ornatqan, al onyń elden kirip-shyǵýy aldyn ala tergeýshimen kelisiledi".
