5 mamyrdan bastap banket zaldary men karaoke-klýbtar «Ashyq» jobasy arqyly jumystaryn bastai alady. Bul týraly QR Densaýlyq saqtaý vitse-ministri – Bas memlekettik sanitar dáriger Erlan Qiiasov aitty, dep habarlaidy "Ult aqparat".
«Biznes qoǵamdastyqtyń bastamasymen 2021 jyldyń qańtarynan bastap Nur-Sultan, Almaty, Qaraǵandy qalalarynda «Ashyq» mobildik qosymshasyn engizý boiynsha ilki jobany júzege asyrý bastaldy. Atalǵan jobany keńeitý maqsatynda, Bas memlekettik sanitar dárigerdiń qaýlysyna sáikes, oǵan Aqtóbe, Kókshetaý, Taraz jáne Taldyqorǵan qalalary qosyldy. Osy jyldyń 21 sáýirindegi jaǵdaiǵa sáikes, baǵdarlama fitnes-klýbtarda, SPA-salondarda, saýnalarda, basseinderde, boýlingterde, biliard zaldarynda, kompiýterlik klýbtarda, kontsert zaldarynda, qoǵamdyq tamaqtaný oryndarynda jumys istep tur», - dedi vitse-ministr Ortalyq kommýnikatsiialar qyzmetindegi baspasóz máslihaty barysynda.
Onyń atap ótýinshe, atalǵan joba oblysaralyq jáne qalaaralyq turaqty emes týristik tasymaldaýǵa da engizilip jatyr.
«5 mamyrdan bastap jobaǵa «jasyl» aimaqtaǵy banket zaldary, sonymen qatar karaoke-klýbtar qosylatyn bolady. 26 sáýirden «Ashyq» jobasyn respýblikanyń barlyq óńirinde taratý josparlanyp otyr. «Ashyq» jobasyna «Info-Kazakhstan» saity arqyly ótinim bergen jáne qyzmet túrine sáikes QR-kod alǵan, sonymen qatar ákimdikterdiń saityna ornalastyrylǵan, 7 kúndik oqýdan ótken biznes ókilderi qatysa alady», - dedi Erlan Qiiasov.
