Almaty qalasynyń sanitarlyq-epidemiologiialyq baqylaý departamenti basshysynyń orynbasary Sádýaqas Baiǵabylov onlain brifing barysynda 9-18 sáýir aralyǵynda Almatyda QR-kod arqyly mártebeni skanerleý kezinde 232 turǵynnan «qyzyl», 39 almatylyqtan «sary» statýs anyqtalǵanyn málim etti, dep habarlaidy QazAqparat.
Onyń aitýynsha, Almatyda «Ashyq» qosymshasyn 341 nysan paidalanady. 26 ótinim qaralý ústinde. Kásipkerler tsifrlyq jobanyń qandai artyqshylyqtary bar ekenin túsindi. Eń aldymen, bul mekemelerge kelýshilerdiń densaýlyǵyn qorǵaidy jáne kúrdeli epidemiologiialyq ahýalda jumys jasaýǵa múmkindik beredi.
«Koronavirýs pandemiia bastalǵaly beri búkil álemde biznes shekteýlermen jumys isteýde. Bul kásipkerlik qyzmet kirisine aitarlyqtai ziian keltirdi. Bul bizdiń elge de qatysty. Birqatar biznesti tolyǵymen jabýdyń jáne shekteýlerdi ishinara alyp tastaýdyń balamasy retinde «Ashyq» pilottyq jobasy iske qosyldy. Mobildi qosymshany densaýlyq saqtaý ministrliginiń jalpy bazasymen biriktirý arqyly kelýshiniń mártebesi anyqtalady: ol adamnyń qazirgi ýaqytta virýstyń tasymaldaýshysy ma, joq pa ekenin kórsetedi. Iaǵni, biznes sýbektisi - jobaǵa qatysýshy qabyldanyp jatqan sanitarlyq sharalarǵa qosymsha baqylaýdy qamtamasyz etedi», - deidi Sádýaqas Baiǵabylov.
Departament ókili qańtar aiynyń ortasynan bastap biznes sýbektileri «Ashyq» jobasyna qosyla bastaǵanyn atap ótti. Ótken aptadan bastap kinoteatrlar jobaǵa qosyldy. Qazirgi ýaqytta M. Áýezov atyndaǵy teatrdyń ótinishi qaralýda. Sáýirdiń ekinshi jartysynda «Ashyq» bazasyna biliard klýbtary men kontsert zaldarynyń kirýi kózdelgen. Mamyr aiynda qala «jasyl» aimaqqa ótken jaǵdaida tolymdylyǵy 50%-dan aspaityn jaǵdaida karaoke, banket zaldaryn qosý arqyly bul tizim keńeitiledi.
Sádýaqas Baiǵabylov joba jumysynyń arqasynda 9-18 sáýir aralyǵynda Almatyda «qyzyl» mártebesi bar 232 jáne «sary» mártebesi bar 39 turǵyn anyqtalǵanyn jetkizdi. QR-kodty oflain da, onlain da skanerleýge bolady.
Sanitarlyq-epidemiologiialyq qyzmet ókili qala turǵyndaryna qosymshanyń qandai rejimde jumys isteitinin eske saldy:
1. Kelýshilerge óz telefondaryna «Ashyq» mobildi qosymshasyn júktep, telefon nomeri boiynsha tirkelip, JSN engizý kerek.
2. Mekemege kirerde óziniń kirýi úshin mekemeniń QR-kodyn skanerleý qajet. Ekranda mártebesi shyǵady (kók, jasyl, qyzyl nemese sary).
3. Shyǵatyn kezde de ózińniń shyqqanyńdy tirkeý úshin QR-kodty skanerleý kerek.
Kelýshide smartfon bolmasa nemese osy mobildi qosymshany júkteý kezinde qiyndyqtar týyndaǵan jaǵdaida jaýapty tulǵaǵa - mekemeniń qyzmetkeri qosymshaǵa kelýshiniń JSN engizý arqyly onyń kirýin tirkei alady.
Sádýaqas Baiǵabylov «Ashyq» qosymshasy, jappai vaktsinatsiia, sanitarlyq-epidemiologiialyq normalardy saqtaý - bul sharalardyń barlyǵy el turǵyndaryna úirenshikti ómir yrǵaǵyna oralýǵa múmkindik beretinin aityp tolyqtyrdy.
Sonymen qatar, ol eger jobaǵa qatysýshylar «Ashyq»-pen jumys isteýge ruqsat alsa, biraq qosymshanyń múmkindikterin paidalanbasa, kelýshilerdi baqylaýsyz ishke kirgizse, olar 230 AEK aiyppul mólsherinde karantindik sharalardy buzǵany úshin jaýapkershilikke tartylatynyn atap ótti.
