Ashyq qosymshasy arqyly qyzyl nemese sary tústi mártebesi anyqtalyp, ushýǵa jiberilmegen jolaýshylar áýe kompaniiasyna ony qalai dáleldeidi? Ortalyq kommýnikatsiialar qyzmetinde joba jetekshilerine osyndai saýal qoiyldy, dep habarlaidy QazAqparat.
Azamattyq aviatsiia komiteti tóraǵasynyń orynbasary Ardaq Tólepovtiń aitýynsha, Ashyq qosymshasy adamnyń mártebesin qyzyl tústi dep anyqtasa, jolaýshyǵa bilet quny tolyqtai óteledi nemese qaita brondaýǵa múmkindik beriledi. Al sary tústi mártebe anyqtalsa, áýe kompaniiasy men jolaýshy arasyndaǵy áýe tasymalynyń sharty boiynsha tólem júrgiziledi.
«Qosymshaǵa jolaýshynyń statýsyn anyqtaý tarihy men kúnin kórsetý máselesin tiisti ministrliktermen jáne «Atameken» palatasymen birge pysyqtap qosymsha habarlaimyz», - dedi komitet ókili.
«Atameken» ulttyq kásipkerler palatasy basqarma tóraǵasynyń orynbasary Iýliia Iakýpaevanyń málimetine súiensek, bilet qunyn qaitar máselesi áýe kompaniialarymen áli pysyqtalyp jatqan kórinedi.
«Eldegi barlyq áýe kompaniialary qyzyl tústi mártebesi anyqtalǵan jolaýshylarǵa bilet qunyn tolyqtai ótep berýge, aly sary tústi mártebesi bolǵan jolaýshylarǵa reis merzimin aýystyrýǵa múmkindik berýge kelisip otyr», - dedi «Atameken» ókili.
Ol, sondai-aq, Ashyq qosymshasynda azamattardyń mártebesin júkteý derekterdi saqtaýda máselede qiyndyq týǵyzbaitynyn túsindirdi.
«Adamdardyń qosymshaǵa kirý ýaqytyn qadaǵalaý o basta qarastyrylmaǵan bolatyn. Biraq qyzyl jáne sary tústi mártebesi anyqtalǵandar týraly málimet kún saiyn jergilikti sanitar dárigerlerge kelip túsip otyrady. Sanitar dárigerlermen osy derekterdi jolaýshylardyń derbes derekterin kótermei-aq alý boiynsha kelisip jatyrmyz. Bul bir jaǵynan azamattardyń jeke derekterin qaýipsiz ustaýǵa, ekinshi jaǵynan áýe kompaniialary jolaýshylardyń bilet qunyn qaitarý týraly ótinishteriniń negizdiligine ońai kóz jetkizýge múmkindik beredi», - dedi Iýliia Iakýpbaeva.
