Jambyl oblysynda muǵalim "mektepte bomba bar" dep jalǵan habar bergen, - dep habarlaidy Tengrinews.kz saity KTK telearnasyne silteme jasap.
Telearna málimetinshe, muǵalim ashyq sabaqqa daiyn bolmaǵandyqtan, "mektepte bomba bar" dep politsiiaǵa habar bergen. Mektep basshylyǵy oqý protsesin toqtatýǵa májbúr bolyp, 300 adam qaýipsiz jerge shyǵarylǵan.
Al jalǵan habar bergen ustaz balalardy evakýatsiialaýǵa kómek berip júripti.
Shý aýdanynyń jas muǵalimi basshylar aldynda óziniń biliktiligin kórsetýge tiis bolǵan. Biraq oǵan esh daiyndyqsyz kelgen soń, sabaqty toqtatý úshin osyndai qýlyq oilap tapqan. Bilim oshaǵynda jarylǵysh zat bar ekeni jariialanǵan soń, kúsh qurylymdary jedel jetip, ustazdar men oqýshylardy dereý dalaǵa shyǵaryp ǵimaratty tintip shyqqan.
Biraq kúdikti eshteńe tabylmady. Esesine, jalǵan málimet bergen azamat jyldam anyqtaldy. Ol - mekteptiń 25 jastaǵy jas mamany bolyp shyqqan. Búkil mektepti dúrliktirgen ustaz qyzmetinen qýyldy. Mundai "qyljaqbastarǵa" qylmystyq jaýapkershilik te qarastyrylǵan.
"Shý aýdanynyń 25 jastaǵy turǵyny ustalyp, kinásin moiyndady. Sotqa deiingi tergep-tekserý isi boiynsha kúdikti QR QPK 128,131-baptarynyń talabyna sáikes Shý aýdany politsiia bóliminiń ýaqytsha ustaý abaqtysyna qamaldy", - dedi Shý aýdany PB bastyǵynyń tergeý jónindegi orynbasary Ashat Baqbergenov.
