Memlekettik qoldaý men sýbsidiialaýdyń arqasynda Qazaqstanda jylqy sany keńestik kezeńge qaraǵanda 1,7 ese kóbeidi. Bul týraly QR Aýyl sharýashylyǵy ministrliginen málim etti, dep habarlaidy "Ult aqparat".
«1991 jyly Qazaqstandaǵy barlyq sanattaǵy sharýashylyqtarda jylqy sany shamamen 1,7 mln bas boldy. Odan keiingi naryqtyq ekonomikaǵa kóshý kezinde mal sany kúrt azaiyp, 2000 jylǵa qarai respýblikadaǵy jylqy sany millionǵa da jetpei qaldy. Memleket 2002 jyldary qoldaý kórsete bastaǵannan keiin mal sanynda ósim baiqaldy. 2011 jyly asyl tuqymdy jylqylardy satyp alýǵa, qymyz ben jylqy etin óndirýge sýbsidiia túrindegi memlekettik qoldaý iske qosyldy. Qabyldanǵan sharalardyń nátijesinde Qazaqstanda búgingi tańda jylqy sany 2,9 mln basqa deiin ósti. Bul 1991 jylǵy jylqy sanynan 1,7 ese, al 2000 jylmen salystyrǵanda 3 ese kóp», - dep atap ótedi ministrlikten.
Sonyń nátijesinde elimizde jylqy sharýashylyǵy men bie sútiniń óndirisi damyp, asyl tuqymdy jylqylardyń sany artty. 2011 jyldan bastap memleket satyp alýdy sýbsidiialap, olardyń úlesi 1,9 ese ósti. Búgingi tańda memleket jylqy sharýashylyǵymen ainalysatyn otandyq taýar óndirýshilerge qoldaý kórsetýdi jalǵastyrýda. Atap aitqanda, satyp alynǵan asyl tuqymdy aiǵyrlar úshin sýbsidiialaý normasy ár basqa 100 myń teńgeden; bie sútin óndirýshiler úshin ár litrine 60 teńgeden; asyl tuqymdy jylqynyń analyq basyn baǵýǵa, jem-shóbine jylyna 20 myń teńgeden jáne jylqy sharýashylyǵyn damytýǵa arnalǵan tehnikalar men jem-shóp daiyndaityn jabdyqtardy satyp alǵanda memleket 25 paiyzdyq óteý úlesimen investitsiialyq sýbsidiia beredi. Bul qoldaý sharalarynyń barlyǵy jylqy fermalary men salalyq qaýymdastyqtardyń usynystary boiynsha jasalǵan. Jalpy alǵanda, 2019 jyly 4,7 myń jylqy fermalary memlekettik qoldaý sharalarymen qamtyldy.
«Sonymen qatar, joǵaryda atalǵan qoldaý sharalaryna qosymsha, jylqy ósirýshilerge «jylqy satyp alýǵa» 10 jylǵa deiingi 6 paiyzdyq jyldyq jeńildetilgen nesie berý qarastyrylǵan. 2016 jyldan beri «Qulan» baǵdarlamasy jumys istep keledi. 2018 jyly 12 myń bas mal satyp alýǵa 512 sharýashylyq qarajat aldy. Byltyr 1 440 sharýashylyqqa 40 myńnan astam jylqy satyp alýǵa jeńil nesie berildi. 2020 jyly qarjylyq qoldaý alýshylardyń sany edáýir artady dep kútilýde. Bul rette jylqy eti - tek ishki naryqqa baǵyttalǵan ónim ekenin atap ótken jón. Eksporttyq naryq múlde joq deýge de bolady«, - delingen vedomstvo málimetinde.
