Qazaqstandyq qyryqqabatqa degen suranys ishki naryqta da, shetelde de kúrt tómendedi. QR Aýylsharýashylyǵy ministrligi osylai málim etti, dep habarlaidy "Ult aqparat".
Ministrliktiń málimdeýinshe, álemde koronavirýstyń taralýy saldarynan azyq-túlik taýarlaryna degen suranystyń ósýi aiasynda Qazaqstan bastapqyda qyryqqabat, piiaz jáne sábiz siiaqty kókónisterdi eksporttaýǵa ýaqytsha tyiym salynǵan.
«Tyiym eldiń azyq-túlik qaýipsizdigi jáne óz halqymyzdy jetkilikti mólsherde azyq-túlik ónimderimen qamtamasyz etý maqsatynda engizilgen. Bul sheshim eski daqyl qorynyń az bolýyna bailanysty shyǵaryldy. Qalai bolǵanda da, byltyrdan qalǵan qordy jańa ónim alý kezeńine deiin jetkizý qajet boldy.
Tyiym salý týraly buiryq 22 naýryz kúni ishki ónimderdi shetelderge jappai shyǵarýǵa bailanysty qabyldandy. Sondai-aq, buiryq 11 kún ǵana áreket etti. 2 sáýirden bastap tyiym alynyp tastalyp, sharýalar belgilengen kvotalar sheńberinde qyryqqabat, piiaz jáne sábizdi eksporttaýǵa múmkindik aldy. Osy ýaqyt ishinde 4 myń tonnaǵa jýyq qyryqqabat eksporttaldy. Fitosanitarlyq sertifikattar ýaqytyly berildi, ótinim bergenderge eshqandai kedergi bolǵan joq», delingen habarlamada.
Óńirlik turaqtandyrý qorlary ishki tutynýǵa qajetti kólemdi satyp alǵannan keiin, 14 sáýirde shekteýdi tolyǵymen alyp tastaǵan.
«Tyiym alynyp tastalǵannan soń, 20 myń tonnadai qyryqqabattyń 971 eksporttyq sertifikaty berildi. Biylǵy jyly qyryqqabatty jappai jinaý 10 sáýirde bastaldy. Osylaisha, eldiń ońtústigi jańa ónimge qol jetkizgen soń, Aýyl sharýashylyǵy ministrligi barlyq tyiym salýlar týraly buiryqtyń kúshin joidy.
Ósirilgen qyryqqabat kóbine Resei Federatsiiasyna, Ýkraina men Belarýs elderine shyǵarýǵa arnaldy. Alaida, karantinniń keńinen engizilýine jáne eksporttyq-importtyq qatynastardyń shektelýine, sondai-aq sýpermarketterdiń, dúkenderdiń, bazarlardyń, meiramhanalardyń jáne basqa da saýda oryndarynyń jabylýyna bailanysty qazaqstandyq qyryqqabatqa degen suranys ishki naryqta da, shetelde de kúrt tómendedi», delingen habarlamada.
Eske sala ketsek, Túrkistan oblysynyń ákimi Ómirzaq Shókeev Úkimetten óńirdegi sharýalardyń qyryqqabatyn ótkizip berýge kómek surady. Onyń aitýynsha aimaqta qazir satylmai jatqan 250 myń tonna qyryqqabat bar.
