QR AShM oramjapyraqty alys jáne jaqyn shetelderge eksporttaýdy toqtatýdy josparlamady jáne tyiym salmady, dep habarlaidy "Ult aqparat" ministrliktiń baspasóz qyzmetine silteme jasap.
QR Aýyl sharýashylyǵy ministrligi osy málimdemesin keibir fermerlerdiń resmi derekkózderdegi aqparatpen tanyspaýyna nemese ony durys túsinbeýine, sondai-aq áleýmettik jelilerde qate, keide ádeii jalǵan aqparattyń taralýyna bailanysty resmi túrde jasaǵanyn jetkizdi.
«Bul degenimiz - oramjapyraqty eksportaýǵa, sonyń ishinde Resei Federatsiiasynyń aýmaǵyna da eksporttaýǵa ruqsat etilgenin bildiredi. Alaida Qazaqstan Respýblikasynda tótenshe jaǵdaidyń engizilýine bailanysty aǵymdaǵy jyldyń naýryz aiynda Memleket basshysy áleýmettik mańyzy bar taýarlardyń jetispeýshiligine jol bermeýdi jáne halyqty azyq-túliktiń jetkilikti kólemimen úzdiksiz qamtamasyz etý úshin olardyń tómendetilmeitin qordy qamtamasyz etýdi tapsyrdy.
Sondyqtan QR Aýyl sharýashylyǵy ministrligi keibir azyq-túlik taýarlarynyń eksportyn retteý týraly ereje engizdi. Olardyń qataryna oramjapyraq, tústi oramjapyraq, japyraqty oramjapyraq, kolrabi jáne basqa da Brassica tektes osyǵan uqsas jeýge jaramdy kókónister kirdi», delingen habarlamada.
Jalǵan aqparattyń odan ári taralmaýy úshin QR Aýyl sharýashylyǵy ministrligi oramjapyraqty shetelge kvota boiynsha eksporttaýǵa ruqsat etilgenin resmi habarlaidy. Vedomstvonyń barlyq tiisti habarlandyrýy men qujattary saitta jariialanǵan.
