QR Aýyl sharýashylyǵy ministri Saparhan Omarovtyń tapsyrmasymen vitse-ministr Gýlmira Isaeva bastaǵan arnaiy top Soltústik Qazaqstan óńirine keldi.
Olar oblysta joǵary patogendi qus tumaýynyń taralýyna jol bermeý maqsatynda jasalyp jatqan keshendi sharalardyń barysyn tekserdi. Bul týraly QR Aýyl sharýashylyǵy ministrliginiń baspasóz hatshysy Janjigit Omarhan óziniń Facebook áleýmettik jelisindegi paraqshasynda habarlady.
«Ózderińiz biletindei, Qazaqstanda 2005 jyldan beri qus tumaýy bolmaǵan. Sondyqtan biz Soltústik Qazaqstan oblysyna óńirde indetke qarsy jumysty durys úilestirýge jáne vaktsinatsiia sharalaryn uiymdastyrýǵa, sondai-aq aýrý oshaqtary anyqtalǵan aýmaqtardy jáne qustardyń ólekselerin joiýǵa kómektesý úshin keldik. Táýekelderdi baǵalaý jáne qus tumaýynyń odan ári taralýyn boldyrmaý úshin barlyq is-áreketterdiń durystyǵyna kóz jetkizý óte mańyzdy boldy.
Sondai-aq, bizdiń mindetimiz - ólgen qustardyń ielerine ótemaqy tóleý boiynsha jumysty jolǵa qoiý. Bizben birge Respýblikalyq epizootiiaǵa qarsy otriadtyń basshysy óz mamandarymen keldi. Olar ótinishterdi qabyldap, zańǵa sáikes tólemder júrgizedi», - dedi arnaiy toptyń kelý maqsaty týraly QR AShM vitse-ministri.
Sonymen qatar, ol komissiia óńirdegi qus fabrikalarynyń basshylarymen kásiporyndar ainalasynda «biologiialyq qaýipsiz ári oqshaýlanǵan» aimaqtar qurý máselesi boiynsha kelissózder júrgizgenin habarlady. Barlyq qajetti talaptar oryndalǵan jaǵdaida óńirdiń qus fabrikalary óz ónimderin erkin ótkizý quqyǵyn ala alady.
«Soltústik Qazaqstan oblysyndaǵy jaǵdai jáne arnaiy toptyń sapary týraly tolyq aqparatty QR Aýyl sharýashylyǵy vitse-ministri Gúlmira Isaeva dúisenbide QR Prezidenti janyndaǵy Ortalyq kommýnikatsiialar qyzmetiniń alańynda jariialaidy», - dep jazdy QR AShM Baspasóz hatshysy Janjigit Omarhan Facebook-tegi paraqshasynda.
