Qazaqstandyq kásipqoi boksshylar Madiiar Áshkeev (13-0, 6KO) pen Meiirim Nursultanov (12-0, 8KO) WBC beldikteri úshin jekpe-jek ótkizedi, dep habarlaidy "Ult aqparat".
«Qazaqstan kásipqoi boksy» akkaýnty VKontakte áleýmettik jelisinde málim etkendei, Madiiar Áshkeev Kaliforniia shtatynda ótetin boks keshiniń basty jekpe-jeginde óner kórsetedi. Ol WBC nusqasy boiynsha AQSh chempiony beldigi úshin 21 márte jeńiske jetken Kleotis Pendarvispen (21-5-2, 9KO) judyryq túiistiredi. Aiqas 9 qarashada Gavaian Gardens qalasynda ótedi.
BoxRec.com aqparatyna súiensek, 33 jastaǵy Kleotis Pendarvispen aiqasta WBC nusqasy boiynsha birinshi orta salmaqtaǵy titýl sarapqa salynady. Sońǵy aiqasyn Madiiar Áshkeev 5 shildede ýkrainalyq Igor Faniianǵa qarsy ótkizip, jeńis tuǵyrynan kóringen edi. Al Pendarvis óziniń sońǵy jekpe-jeginde Abel Sanchestiń shákirti ýkrainalyq Sergei Bogachýkke (15-0, 15KO) ese jibergen.
Al qazaqstandyq taǵy bir kásipqoi boksshy Meiirim Nursultanov Jánibek Álimhanulynyń burynǵy qarsylasy meksikalyq Kristian Olivaspen (16-5, 13KO) kezdesedi.
BoxRec.com aqparatyna sai, 27 jastaǵy meksikalyq otandasymyzben orta salmaqta WBC (USNBC) nusqasy boiynsha AQSh chempiony ataǵy úshin baq synaspaq. Aiqas 10 raýndqa eseptelgen. Aita ketsek, Meiirim Nursultanov Kanelo-Kovalev aiqasynyń anderkartynda jekpe-jekke shyǵatyny buǵan deiin habarlanǵan bolatyn.
Olivas osy jyldyń 12 sáýirinde Jánibek Álimhanulymen (7-0, 3KO) shyǵyp, ese jibergen edi.
