Qazaqstan Respýblikasy Parlamenti Senatynyń Tóraǵasy Máýlen Áshimbaev radio qyzmetkerlerin kásibi merekesimen quttyqtady, dep habarlaidy "Ult aqparat".
«Qurmetti radio qyzmetkerleri! Sizderdi búgingi kásibi merekelerińizben shyn júrekten quttyqtaimyn!
Memleket basshysynyń bastamasymen belgilengen bul kún biyl elimizde alǵash ret atalyp ótýde. Onyń ózindik máni bar. Sebebi, biyl otandyq radiolardyń qarashańyraǵy Qazaq radiosynyń habar tarata bastaǵanyna týra 100 jyl tolyp otyr. Osy jyldardyń ishinde Qazaq radiosy halqymyzdyń kúndelikti tynys-tirshiliginen bastap tarihymyz ben dástúrimizdi, ádebietimiz ben mádenietimizdi, ónerimiz ben ulttyq qundylyqtarymyzdy dáripteýge úlken úles qosty», - dedi Senat Tóraǵasy.
Sondai-aq, Joǵary palata basshysy ár jyldary osy ujymda Ámire Qashaýbaev, Ahmet Jubanov, Sháken Aimanov, Shámshi Qaldaiaqov siiaqty birtýar tulǵalar eńbek etkenin, qazaq diktorlyq mektebiniń shyńynda turǵan Ánýar Baijanbaev, Mina Seiitova, Saýyq Jaqanova siiaqty maitalman mamandar ult maqtanyshyna ainalǵanyn atap ótti.
«Qazirgi tańda Qazaq radiosynyń «Altyn qorynda» saqtalǵan ánder men kúiler, suhbattar men áńgimeler, jańalyqtar men sholýlar ultymyzdyń bir ǵasyrlyq shejiresi dese, artyq emes. Baýyrjan Momyshuly, Muqaǵali Maqataev syndy uly tulǵalarymyzdyń daýsy saqtalǵan sirek jazbalardyń búginge jetýi - sonyń jarqyn kórinisi.
Táýelsizdik otandyq radio salasynyń damýyna tyń serpin berdi. Buryn bir ǵana Qazaq radiosy bolsa, egemendik kezeńinde ondaǵan jańa radiolar ashyla bastady. Olardyń taqyryptyq aiasy da aitarlyqtai keńeie tústi», - dedi ol.
Odan bólek, Máýlen Áshimbaev aldaǵy ýaqytta elimizde bul sala budan da erekshe ekpinmen damitynyna senim bildirdi.
«Elimizdegi barsha radio qyzmetkerlerin tól merekelerimen quttyqtai otyryp, zor densaýlyq jáne shyǵarmashylyq tabys tileimin! Ultty uiystyratyn jáne otanshyldyqqa úndeitin habarlaryńyz kóp bolsyn!», - dep túiindedi Senat Tóraǵasy.
