Tóle bi babamyzdyń ómiri men ósietterine de erekshe nazar aýdarǵanymyz jón. Bul týraly QR Parlamenti Senatynyń tóraǵasy Máýlen Áshimbaevtiń Facebook-te jazdy, dep habarlaidy "Ult aqparat".
«Keshe qasietti juma kúni Ózbekstanǵa jasaǵan sapar aiasynda Tóle bi babamyzdyń kesenesine arnaiy baryp, ziiarat ettik. Tashkent qalasynda ornalasqan bul keshen shahardaǵy kórikti jerlerdiń biri sanalady. Sondyqtan munda Ortalyq Aziiadan, onyń ishinde Qazaqstannan jáne basqa da shet elderden keletin týristerdiń qatary kóp. Tóle bidiń qazaq tarihynda alatyn orny erekshe. Ásirese, handyq tusynda memlekettik isterge aralasyp, mańyzdy sheshimder qabyldaýǵa belsene atsalysty. Jaýgershilik zamanda halyqtyń birligi men eldiń tutastyǵyn saqtaýǵa úlken úles qosty. Dástúrli ádet-ǵuryptarymyz ben zańdarymyzdyń jinaǵy «Jeti Jarǵynyń» jazylyp, qabyldanýyna da zor eńbek sińirgeni tarihtan belgili. Áigili Abylai hannyń el tizginin ustaityn tulǵa bolyp qalyptasýynda Tóle bidiń róli erekshe bolǵanyn bilemiz. Aqyl-parasatymen ádil sheshimder shyǵaryp, úlken daýlardyń aldyn alyp otyrǵan babamyz bar qazaqtyń basyn qosýdy basty maqsat tutqan edi. Tóle bi aitqan sózder búginde búkil ultymyz úshin úlgi-ónege ekeni daýsyz», - dep jazdy Senat tóraǵasy.
Osy oraida M. Áshimbaev qazirgi tańda elimizde Memleket basshysynyń tapsyrmasy boiynsha tarihi sanamyzdy jańǵyrtý jáne ulttyq qundylyqtarymyzdy dáripteý jumystaryna basymdyq berilip otyrǵanyn atap ótti.
«Osy turǵydan kelgende, Tóle bi babamyzdyń ómiri men ósietterine de erekshe nazar aýdarǵanymyz jón. Bul tarihymyzdy taný jáne shejiremizdi zertteý jolyndaǵy mańyzdy qadamdardyń biri bolary anyq. Sondyqtan aldaǵy ýaqytta tarihshylarymyz osy baǵytqa da basymdyq beredi dep senemiz», - dedi Senat spikeri.
Eske sala keteiik, 4 maýsym kúni Qazaqstan Parlamenti Senatynyń tóraǵasy Máýlen Áshimbaev Ózbekstanǵa resmi sapary aiasynda osy eldiń Prezidenti Shavkat Mirzieevpen kezdesti.
