Foto: Parlament Senatynyń baspasóz qyzmeti
Senat tóraǵasy Máýlen Áshimbaev Memleket basshysynyń kelesi jyly aýqymdy kadrlyq ózgeris bolatyny týraly málimdemesine qatysty pikir bildirdi, - dep habarlaidy Tengrinews.kz agenttigi.
Áshimbaev Memleket basshysy Qasym-Jomart Toqaev Úkimetke áleýmettik, infraqurylym máseleleri, ekonomikalyq ósim, kásipkerlikti qoldaý jáne basqa da salalar boiynsha tapsyrmalar bergenin eske saldy. Bul turǵyda Úkimet barlyq tapsyrmalardy oryndaýǵa, eldegi saiasi, ekonomikalyq jáne áleýmettik reformalardy odan ári júzege asyrýǵa, sondai-aq Prezidenttiń sailaý aldyndaǵy baǵdarlamasyn oryndaýǵa nazar aýdarýy kerek.
"Sondyqtan atqaratyn qyzmetine kim laiyq ekenin nemese kim jumysyn oryndai alady degen baǵa berýim orynsyz bolar. Baǵalaý jáne sheshim qabyldaý – Memleket basshysynyń quzyreti. Prezident Úkimettiń keńeitilgen otyrysynda túitkildi máselelerdi de atap ótti. Budan ári Memleket basshysy jumysyn tiisti deńgeide atqara alatyndardy baǵalap, tiisti sheshim qabyldaidy dep oilaimyn", - dedi Áshimbaev Senattyń jalpy otyrysynan keiin tilshiler suraǵyna jaýap bere otyryp.
Sonymen qatar ol 2023 jyldyń birinshi jartyjyldyǵynda Májilisti sailaý josparlanyp otyrǵanyn aitty. Qoldanystaǵy zańnamaǵa sáikes, bul sailaý ótkennen keiin, Úkimet otstavkaǵa ketip, jańa Ministrler kabineti jasaqtalady.
"Bul turǵyda Parlamentte naqty ministrler men Úkimet músheleri laýazymdaryna úmitkerler talqylanady. Osy oraida kimniń qalyp, kimniń jumysyn jalǵastyratyny olardyń tiimdiligine, atqaratyn jumystaryna bailanysty bolady. Memleket basshysy tiisti baǵasyn beredi dep oilaimyn. Májilis sailaýynan keiin tiisti ózgerister bolýy múmkin. Biraq bul ózgerister Memleket basshysynyń quzyretine jatady", - dedi Senat tóraǵasy.
