Prezident bastamalaryn iske asyrý – halyq bolyp jumylatyn ortaq mindet. Bul týraly búgin elimizdiń qoǵam ókilderimen kezdesken Senat Tóraǵasy Máýlen Áshimbaev aitty, dep habarlaidy QazAqparat.
«Búgin «Ulttyq múdde» alańynyń alǵashqy otyrysyna jinalyp otyrmyz. Otyrysymyz Prezidentimizdiń keshegi Joldaýyna arnalady. Joldaýmen bárińiz tanysyp shyqtyńyzdar. Joldaýda Memleket basshysy «Jańa Qazaqstan» qurýdyń naqty saiasi baǵdaryn aiqyndap berdi. Prezidentimiz elimizdiń jarqyn bolashaǵyn qamtamasyz etýge arnalǵan kóptegen mańyzdy bastamalardy kóterdi. Sol sebepti, olardy iske asyrý – halyq bolyp jumylatyn ortaq mindet», - dedi Máýlen Áshimbaev.
Onyń atap ótýinshe, osy Joldaýmen Prezidentimiz elimizde úlken saiasi ózgeristerge jol ashty jáne oǵan tyń serpin berdi.
«Al saiasi transformatsiia, eń birinshi kezekte, elimizde ádilettilik qaǵidatynyń saqtalýyna kepil bolady. Ádilettilik bolmaǵan jerde azamattardyń eline jáne onyń bolashaǵyna degen senimi joǵalady. Bul – memlekettiligimiz úshin úlken qaýip. Qańtar oqiǵasynyń negizgi sabaqtarynyń biri osy ekeni anyq. Sol sebepti, zańnyń tolyqtai oryndalýyna jáne jalpyǵa birdei qoldanylýyna qol jetkizý asa mańyzdy. Zań ústemdigi degenimiz sol. Bul, óz kezeginde, tamyr-tanystyqty jáne monopoliiany joiýǵa tikelei yqpal etedi», - dedi ol.
Osy rette Senat spikeri Prezidentimiz ózi úlgi kórsetip, birqatar batyl bastamalardy jariialaǵandyǵyna nazar aýdartty.
«Eń birinshi kezekte bilik monopoliiasy joiylmaq. Buǵan qatysty Memleket basshysy elimizdiń sýperprezidenttik basqarý júiesinen myqty Parlamenti bar prezidenttik respýblikaǵa kóshetinin aitty. Endi Parlament sózsiz, kúsheiedi. Sonymen qatar Senattyń joǵary Palata retinde jumys isteýi durys ári oryndy ekenin aityldy. Sonymen qatar eki Palatanyń jumysy men qurylymyna qatysty naqty reformalardy usyndy. Onyń bári qoǵamnyń pikiri men usynystaryna negizdelgenin atap ótken jón», - dedi Máýlen Áshimbaev.
