Qazaqstan Parlamenti Senatynyń Tóraǵasy Máýlen Áshimbaev Ózbekstanǵa resmi sapary aiasynda osy eldiń Prezidenti Shavkat Mirzieevpen kezdesti, dep habarlaidy QazAqparat.
Senattyń baspasóz qyzmetinen málim etkendei, Ózbekstan Prezidenti joǵary deńgeidegi turaqty jáne tiimdi bailanystyń arqasynda qol jetken dostyq, tatý kórshilik jáne strategiialyq seriktestikke negizdelgen búgingi qazaq-ózbek qatynasyn erekshe atap ótti.
Óz kezeginde Senat Tóraǵasy Máýlen Áshimbaev Ózbekstan kóshbasshysyna qabyldaýy úshin alǵysyn bildirip, Qazaqstan Prezidenti Qasym-Jomart Toqaevtyń sálemin jetkizdi.
Máýlen Áshimbaev parlamentaralyq ózara is-qimyldy nyǵaitý maqsatymen Olii Májilistegi áriptesterimen birlesip atqarylyp jatqan jumystar týraly da aitty.
Qazaqstan Senatynyń Tóraǵasy eki memlekettiń Prezidentteri yntymaqtastyqtyń joǵary deńgeiin belgilep bergenin tilge tiek etip, ony el Parlamentteri arqyly qoldaýdyń mańyzdy ekenine nazar aýdardy. Qazaqstan Respýblikasynyń Tuńǵysh Prezidenti – Elbasy Nursultan Nazarbaev Qazaqstan men Ózbekstan arasyndaǵy qarym-qatynastyń nyǵaiýyna basa mán berip otyr.
Senat Spikeri Qazaqstan men Ózbekstannyń parlamentaralyq yntymaqtastyǵy belsendi damyp kele jatqanyn jáne onyń barlyq qyrlary boiynsha ózara túsinistikke qol jetkizilgenin atap ótti.
Sondai-aq, Máýlen Áshimbaev Qazaqstan men Ózbekstannyń arasyndaǵy yntymaqtastyq eki eldiń bolashaǵyna oń áserin tigizetinine senim bildirdi. Al, tatý kórshilik, syndarly jáne ózara tiimdi qarym-qatynas – elderimizdiń ósip-órkendeýiniń kepili.
«Bizdiń tyǵyz, jan-jaqty jáne ózara senimge negizdelgen bailanystarymyz eki memlekettiń de ulttyq múddelerine sai keledi. Memleket basshylary deńgeiindegi senimdi jáne nátijeli dialog osyndai yntymaqtastyqtyń irgetasy bolyp sanalady. Qazaqstan Parlamentiniń Senaty Qazaqstan men Ózbekstan arasyndaǵy parlamentaralyq yntymaqtastyqty nyǵaitý jáne strategiialyq seriktestikti damytý úshin barlyq qajetti jumysty atqarady», – dedi Máýlen Áshimbaev.
Sonymen qatar kezdesý barysynda mádeni-gýmanitarlyq bailanystardy nyǵaitýdyń perspektivalary, halyqaralyq arenadaǵy ózara is-qimyl jáne taǵy basqa máseleler talqylandy.
