«Nur Otan» partiiasy Tóraǵasynyń Birinshi orynbasary Máýlen Áshimbaev partiia filialdarynyń ókilderimen kezdesti. Partiianyń óńirlik, aimaqtyq filialdarymen qatar iri kásiporyndar bazasynda qurylǵan filial jáne bastaýysh partiia uiymdarynyń basshylary qatysqan jiynda Elbasynyń partiia qyzmetin jańǵyrtý jónindegi tapsyrmasy keńinen talqylandy.
Bul týraly «Nur Otan» partiiasynyń baspasóz qyzmeti habarlaidy.
Jiyndy ashqan Máýlen Áshimbaev partiialyq jańǵyrýdyń basym baǵyttaryn atap ótip, alda turǵan mindetterdiń aimaqtyq deńgeide de asa mańyzdy ekenine nazar aýdardy. Partiia Tóraǵasy Birinshi orynbasarynyń aitýynsha, nurotandyqtar elimizde qolǵa alynǵan júieli ózgeristerdiń negizgi qozǵaýshy kúshi bolýy kerek. Sol úshin aldymen ózimizge partiianyń negizgi mindetin anyqtap, ideologiialyq jumystyń baǵyt-baǵdaryn aiqyndap alý kerektigin aitqan Máýlen Áshimbaev:
- Biz búginde kóbine ishki jumystarǵa basymdyq berip, solarmen ǵana shektelip qalǵandaimyz. Tipti keibireýler Ortalyq apparatqa quddy bir ministrlik, al partiianyń aimaqtardaǵy filialdaryna jergilikti ákimdikterdiń bir bólimindei qaraidy. Bul Elbasymyzdyń partiianyń aldyna qoiǵan maqsat-mindetteri men atqarar rólin durys túsinbeýdiń saldarynan bolyp otyr. Memleket basshysy: «Nur Otan» - ministrlik te, atqarýshy bilik te emes. Ol - strategiialyq kúsh», - dep partiianyń baǵyt-baǵdaryn anyqtap berdi. Sondyqtan biz jumysy júieli ári tiimdi, mindeti aiqyn strategiialyq kúsh bolyp qalyptasýymyz kerek, - dedi.
Máýlen Áshimbaev partiianyń jańa baǵytta jumys istep, naqty nátijelerge qol jetkizýi úshin qalyptasqan ádis-tásilder men formatty ózgertýdi usyndy. Birinshi kezekte partiia jumysyna debiýrokratizatsiia qajet ekenin de tilge tiek etti. Bul, árine, óńirlerge de tikelei qatysty bastama. Sondyqtan jergilikti jerlerde nurotandyqtar ózderin partiia sheneýnigi emes, halyqpen ashyq ári tikelei jumys isteitin partiia múshesi retinde kórsete bilýi tiis. Partiialyq is-sharalardy taptaýryn nusqadan aryltyp, qoǵammen saiasi bailanysty jańasha qarqynmen qaita ornatýdyń da mańyzy zor. Nurotandyqtardyń uiymdastyrýymen ótetin ár is-shara mándi, mazmundy, kreativti bolyp qana qoimai, naqty nátijege qol jetkizýi kerek.
Sondai-aq, jiynda ideologiialyq jumystarda óńirlerdiń «Rýhani jańǵyrý» baǵdarlamasyna basymdyq berýi kerektigi aityldy. Osy turǵydan kelgende Qazaqstandaǵy jetekshi saiasi kúsh sanalatyn «Nur Otan» partiiasy qundylyqtar men jańǵyrý ideiasynyń jarshysy retinde ár qazaqstandyqqa onyń máni men mańyzyn túsindirýi tiis.
- Qazirgi tańda «Nur Otan» partiiasy kóz aldymyzǵa úlken bir sport saiysynda jeńiske jetip, keiin jattyǵýdy umytqan, óz ózimen jumys isteýdi múldem toqtatqan, aldaǵy maqsat-múddelerin ysyryp qoiyp, kúndelikti kúibeń tirlikten aryla almai ómirdiń aǵysymen ǵana jyljyp kele jatqan sportshyny elestetedi. Sondyqtan barshamyz ol sportshynyń qaitadan es jiyp, qarqyndy jattyǵýyna, maqsattaryn aiqyndap, fizikalyq qana emes intellektýaldy turǵyda da óz ózin qolǵa alýyna jáne naǵyz chempion bolýyna kúsh jumsaýymyz kerek. Bul - bizdiń aldaǵy ýaqyttaǵy basty mindetimiz. Osy jolda bárimiz judyryqtai jumylýǵa tiispiz, - dedi partiia Tóraǵasynyń Birinshi orynbasary.
Sonymen qatar Máýlen Áshimbaev óńirlik filialdar men bastaýysh partiia uiymdarynyń aldynda turǵan basty mindetterge nazar aýdardy. Eń aldymen, partiia ókilderi óz óńirlerindegi qoǵamdyq-saiasi jaǵdaidy tolyq baqylaýda ustaýy tiis. Halyqtyń alańdatqan máselelerdi der kezinde anyqtap, jedel áreket etip, keiin ony partiialyq deńgeide sheshýdiń joldaryn usynýlary kerek. Soǵan orai arnaiy Áleýmettik júktemeler kartasy daiyndalmaq. Barlyq partiialyq jobalardyń ózektiligi artyp, jańa bastamalar qolǵa alynatyn boldy. Osy rette «Nur Otan» partiiasy Tóraǵasynyń Birinshi orynbasary partiia bastamashy bolǵan árbir joba esep úshin ǵana qolǵa alynbai, halyqqa naqty paidasy tietin mańyzǵa ie bolý kerektigin aitty.
Kadr máselesi de nazardan tys qalmady. Sonyń nátijesinde aldaǵy ýaqytta eń belsendi, el múddesin birinshi kezekke qoiatyn bilikti mamandardan kadrlyq rezerv qurylyp, solardyń qataryndaǵy partiia músheleri memlekettik organdar men máslihattardaǵy, tipti Parlamenttegi bos laýazymdarǵa usynylatyny aityldy. Odan bólek, Máýlen Áshimbaev sailaýaldy baǵdarlamada kórsetilgen ýádeler men mindetterdi oryndaý úshin árbir filialǵa bilek sybanyp jumys istep, naqty nátijelerge qol jetkizýdi tapsyrdy.
- Elbasy, partiia Tóraǵasy Nursultan Ábishuly Nazarbaev bizge aýqymdy strategiialyq mindetter júktedi. Biz «bir jeńnen - qol, bir jaǵadan bas shyǵaryp» áreket etsek, bul tapsyrmalardy tabysty júzege asyryp, partiianyń qyzmetin jańa sapaǵa kóteremiz dep senemin. Osylaisha partiiany zamanaýi, joǵary tehnologiialy, belsendi, perspektivaly, innovatsiialyq saiasi uiym retinde qaita qurýǵa múmkindik alamyz. Bul bizdiń qolymyzdan keletinine senemin. Biz jumys barysynda qandai tásilder men ádisterdi ózgertý kerektigin jáne aldymyzdaǵy mindetterimiz ben baǵyt-baǵdarymyzdy naqty túsindik. Osy baǵyttaǵy jumystarǵa partiiamyzdyń barlyq óńirlik filialdary belsene atsalysady dep úmittenemin, - dedi Máýlen Áshimbaev.
Sondai-aq, jiynda partiia Hatshylary Ǵabidolla Ábdirahymov, Qanybek Jumashev jáne Farhad Qýanǵanov sóz alyp, óz jumys baǵyttary boiynsha baiandama jasady.
