Qazaqstanda azamattardyń keibiri Konstitýtsiiaǵa ózgeristerdiń jii engizilýine narazy. Ata zańdy «chernovikke» ainaldyrdyńdar dep te synaidy olar. Bul jóninde ne deisiz? Osy suraq búgin Senat otyrysynan keiin joǵary palatanyń tóraǵasy Máýlen Áshimbaevqa qoiyldy, dep jazady Ulysmedia.kz.
«Konstitýtsiia ylǵi ózgeris engizile beretin qandai da bir qujatqa ainaldy degen sózben kelispeimin. Menińshe, biz Konstitýtsiiaǵa shynynda da, sirek bolsa da ózgeris engizemiz. Konstitýtsiianyń ózi 1995 jyly qabyldanǵan. Sodan beri ózgerister aitarlyqtai kóp engizildi dep aita almaimyn», - dedi Máýlen Áshimbaev.
Senat tóraǵasynyń aitýyna qaraǵanda «bul jolǵy jaǵdai biregei».
«Biz atalmysh máseleni respýblikalyq referendýmǵa shyǵaryp jatyrmyz. Halyq daýys beredi de, óz ustanymyn bildiredi. Negizgi pozitsiialar boiynsha bul jerde máseleni depýtattar sheshpeidi. Sondyqtan bul jerde jaǵdai erekshe der edim. Halyq daýys beredi. Qazaqstan halqy qalai sheshedi – solai bolady», - dedi ol.
Máýlen Áshimbaev Konstitýtsiiaǵa ózgeris engize berýdi ózi de qoldamaitynyn aita kele Ata zańdy kieli qujatqa, bazalyq qujatqa teńedi.
«Eger biz Konstitýtsiiany ózgertetin bolsaq, birshama zań ózgeredi de munyń sońy belgili bir deńgeide túsinbeýshilik týǵyzýy múmkin», - deidi ol.
Elbasy týraly zańnyń Máýlen Áshimbaev májilis depýtaty bolǵan kezinde qabyldanǵanyn tilshiler Senat tóraǵasynyń esine salǵan. Al qazir jaǵdai ózgergende bul jóninde Áshimbaevtyń ózi ne oilaitynyn tilshiler bilgisi keldi. «Men ol úshin uialmaimyn» dep jaýap berdi Senat tóraǵasy.
«Tuńǵysh Prezidenttiń mártebesine qatysty qandai artyqshylyqtary bar ekenine tiisti túsinik berý kerek. Onyń barlyǵy eks-prezidentterge qandai artyqshylyqtar beriletin bolsa, iaǵni áleýmettik jaǵynan qorǵalýy men qaýipsizdigine qatysty máselelerdiń barlyǵy Tuńǵysh Prezidentke de beriledi. Bul turǵyda eshkimniń de artyq bir dárejesi bolmaidy. Bolashaqta Qazaqstanda biraz Prezidentter bolatyn shyǵar. Osy oraida áleýmettik turǵydan qorǵaý, qaýipsizdigin qamtamasyz etetin normalar eks-Prezidentterge birdei qatysty bolady. Bul normalar Konstitýtsiiadar bar, sol normalardyń barlyǵy Tuńǵysh Prezidentke qatysty qoldanylady», - dedi Máýlen Áshimbaev.
Áshimbaevqa Konstitýtsiianyń 91 babynan Nursultan Nazarbaevqa qatysty “Táýelsiz Qazaqstannyń irgesin qalaýshy” degen sózdiń alynýy jóninde birneshe suraq qoiylǵan. Sońynda Senat spikeri jýrnalisterge bylai dedi.
«Halyqtyń pikiri eskerildi. Adamdardyń oiy shynynda da esepke alynyp jatyr. Adamdardyń dál osyny suraǵanyn ózderińiz de bilesizder. Ózderińiz de sondai pozitsiiadasyzdar ǵoi. 95-99 paiyzyńyz shyǵar!..»
