Búgin Senat Tóraǵasy Máýlen Áshimbaevtyń qatysýymen Palata janyndaǵy Jas sarapshylar klýbynyń kezekti otyrysy ótti. Altynshy ret uiymdastyrylyp otyrǵan otyrysta qatysýshylar azamattyq qoǵamnyń damý úrdisi men elimizdegi media salasynyń bolashaǵy týraly sóz qozǵady. Kezdesýge Qazaqstannyń Aqparat jáne qoǵamdyq damý ministri Aida Balaeva, Klýb músheleri jáne arnaiy shaqyrylǵan sarapshylar qatysty, dep habarlaidy "Ult aqparat" Senattyń baspasóz qyzmetine silteme jasap.
Otyrysty ashqan Máýlen Áshimbaev Memleket Basshysy Qasym-Jomart Toqaevtyń azamattyq jáne saiasi saladaǵy negizgi bastamasy «Halyq únine qulaq asatyn memleket» tujyrymdamasy ekenin atap ótti. Sondai-aq osy tujyrymdama aiasynda bilik pen qoǵamnyń turaqty dialogyn jolǵa qoiýǵa jáne memleketti basqarýǵa azamattyq qoǵamnyń qatysýyn arttyrýǵa arnalǵan júieli reformalar qolǵa alynǵanyna nazar aýdardy.
Senat Spikeri qazirgi tańda elimizde qoǵamdyq-saiasi salada kezeń-kezeńimen júrgizilip jatqan reformalar jalǵasyp otyrǵanyn aitty. Bul jumystarǵa el Prezidentiniń Qazaqstan halqyna Joldaýynda aitylǵan basymdyqtar tyń serpin berdi.
«Memleket basshysynyń biylǵy Joldaýynda mańyzdy mindetter belgilendi. Birinshiden, Prezidentimiz aýyldyq jerlerde azamattyq bastamalardy qoldaýdyń tiimdi tetigin ázirleýdi mindet etip qoidy. Ekinshiden, Memleket basshysy depýtat mandatyn bólý kezinde áielder men jastar úshin 30 paiyzdyq kvotany mindetti túrde eskerý týraly normany zańmen bekitýdi tapsyrdy. Úshinshiden, Prezidentimiz, erekshe qajettiligi bar azamattarǵa da kvota belgileý kerektigin aitty. Mundai qadamdar halyqtyń ártúrli toptarynyń azamattyq quqyqtaryn eskeretin inkliýzivti qoǵam qurýǵa yqpal eteri sózsiz», – dedi Senat Tóraǵasy.
Klýb otyrysynda talqylanǵan mańyzdy máselelerdiń biri media salasyna qatysty boldy. Máýlen Áshimbaev pandemiia kezeńinde mediakommýnikatsiianyń erekshe ról atqarǵanyn tilge tiek etti.
«Pandemiia kezeńinde naqty málimetter men tekserilgen aqparattardyń tapshylyǵy baiqaldy. Sondyqtan adamdar aqparat kózderine muqiiat mán berip, bedeldi medialarǵa ǵana basymdyq berdi. Budan sapaly jańalyqtar taratatyn jýrnalistika paida kórdi. Nátijesinde, álemniń jetekshi aqparat quraldarynyń oqyrmandary kóbeiip qana qoimai, olardyń aqyly jazylymdary da arta túsken», – dedi Palata Tóraǵasy.
Sonymen qatar Máýlen Áshimbaevtyń aitýynsha, mundai úrdistiń keri áseri de baiqalǵan. Belgisizdik pen resmi aqparat kózderine degen senimsizdik feik-niýsderdiń jáne ártúrli konspirologiialyq teoriialardyń kóbeiýine ákelip soqtyrǵan.
«Qazirgidei aqparattar aǵynynda adasyp qalmaý úshin adamǵa aq pen qarany ajyratatyn arnaiy bilim kerek. Bul rette jańa zaman adamy úshin mediasaýattylyqtyń mańyzy zor ekeni sózsiz. Menińshe, osy trendti eskerip, Qazaqstanda álemge ǵylymi kózqaras qalyptastyratyn salalyq jýrnalistikany damytýǵa jáne ǵylymdy dáripteitin qoǵamdyq pikirdiń kóshbasshylaryn daiyndaýǵa kóńil bólgen jón. Bul media salasynyń sapasyn arttyrýǵa múmkindik beredi», – dedi Máýlen Áshimbaev.
Jas sarapshylar klýbynyń basqosýynda qatysýshylar qoǵamdyq joba retinde Taldaý mektebin qurýdy usyndy. Máýlen Áshimbaev mundai Mektepte tyńdaýshylar taldaý mátinderi men zertteý ádisnamasyn jazý siiaqty qoldanbaly tásilderdi, derekter bazasymen jumys isteýdi, memlekettik basqarýda, halyqaralyq qatynastar men diplomatiiada qoldanylatyn analitikalyq ádisterdi meńgerýge múmkindik alatynyn atap ótti. Dáris oqý jáne treningter ótkizý úshin belgili qazaqstandyq sarapshylar men zertteýshilerdi shaqyrý josparlanyp otyr.
«Shyn máninde, qazir kóp salada taldaý tásilderiniń álsiregeni baiqalady. Mundai úrdis, ásirese, memlekettik basqarýda aitarlyqtai másele týdyryp otyr. Sebebi, bul saladaǵy sheshimder salmaqty taldaýlar men zertteýler negizinde qabyldanýy kerek. Ókinishke qarai, qazir kóptegen sheshimder qalyptasqan jaǵdaiǵa bailanysty, týyndaǵan qiyndyqtarǵa jaýap retinde ǵana qabyldanady. Klýbtyń aldyńǵy otyrystarynyń birinde men mundai jaǵdai álemdegi gýmanitarlyq bilimniń daǵdarysymen bailanysty ekenin aitqan edim. Osy rette Klýb músheleriniń qoǵamdyq Taldaý mektebin qurý týraly usynysyn ózekti jáne ýaqtyly dep esepteimin. Aldaǵy ýaqytta elimizdegi jetekshi joǵary oqý oryndarynyń biriniń gýmanitarlyq fakýltetimen yntymaqtasa jumys isteý múmkindigi qarastyrylýda. Osy rette Mektep jumysyna qoldaý kórsetýge daiyn ekenimdi de aitqym keledi», – dedi Máýlen Áshimbaev.
Otyrys barysynda qatysýshylar azamattyq qoǵamdy jáne mediasferany damytýǵa qatysty óz oilaryn bildirip, pikirlerimen bólisti. Saiasattaný salasyndaǵy PhD Juldyzai Ysqaqova Qazaqstandaǵy saiasi institýttarǵa degen qoǵamdyq senim dinamikasynyń zertteý nátijelerin jariialady. Óz kezeginde quqyqtaný salasyndaǵy PhD Músilim Hasenov azamattardyń aqparat alý quqyqtarynyń iske asyrylýy jáne olardyń memleket isterin basqarýǵa qatysýy týraly sóz qozǵady. Saiasi sholýshy Ǵaziz Ábishev Qazaqstandaǵy blogosfera men áleýmettik jelilerdi zańnamalyq retteýge qatysty oiyn bildirdi. Eýraziialyq integratsiia institýtynyń sarapshysy Nikita Shatalov analitikalyq jýrnalistikany damytý jáne media naryqty retteýdiń jańa tásilderi týraly usynystaryn jetkizdi.
Otyrysty qorytyndylaǵan Máýlen Áshimbaev sarapshylar aitqan usynystar men pikirler Parlament jumysynda eskeriletinin aityp, Aqparat jáne qoǵamdyq damý ministrliginiń de nazaryna alynatynyna senim bildirdi.
