Soltústik Qazaqstan oblysynda úsh aýysymdy jáne apattyq jaǵdaidaǵy mektepterdi joiý maqsatynda 16 mektep salynady. Bul týraly Úkimet otyrysynda SQO-nyń 2021-2025 jyldarǵa arnalǵan áleýmettik-ekonomikalyq damýynyń keshendi josparyn tanystyrý kezinde QR Ulttyq ekonomika ministri Áset Erǵaliev málim etti, dep habarlaidy QazAqparat.
«Densaýlyq saqtaý jáne bilim berý júieleri qyzmetteriniń qoljetimdiligi men sapasyn arttyrý úshin qazirgi zamanǵy infraqurylym qurý kózdelgen. Oblystyq kópbeiindi aýrýhana, sondai-aq aýdan ortalyqtarynda, tirek jáne spýtniktik aýyldyq eldi mekenderde 47 meditsinalyq nysan salynady», - dedi ministr.
Onyń aitýynsha, úsh aýysymdy jáne apattyq jaǵdaidaǵy mektepterdi joiý maqsatynda 16 mektep salynady. Sondai-aq, erekshe bilim berilýine qajettiligi bar balalarǵa arnalǵan 400 oryndyq ońaltý mektep-internatynyń qurylysy josparlanyp otyr. Sonymen birge, Nazarbaev Ýniversitetiniń jáne Akademiialyq kóshbasshy ortalyǵy tájiribesi boiynsha JOO qurylatyn bolady.
Budan bólek, kýrsanttardyń turǵyn úi-turmystyq jaǵdaiyn jaqsartý jáne ofitserlerdi daiarlaý sapasyn arttyrý maqsatynda Ulttyq ulan Áskeri institýtynyń ǵimarattary men qurylystaryn salý josparlanyp otyr.
