Qazaqstan Grýziiada otandasymyzdyń ólimine bailanysty jedel tergeý tobyn jiberedi. Bul týraly QR Ishki ister ministrliginiń resmi ókili Nurdildá Oraz málim etti, dep habarlaidy "Ult aqparat".
«Taiaý ýaqytta halyqaralyq kelisimderge sáikes, QR Bas prokýratýrasy men Syrtqy ister ministrliginiń úilestirýimen Ishki ister ministrligi Grýziiaǵa jedel tergeý tobyn jiberedi. Onyń mindeti - oryn alǵan qaiǵyly jaittyń barlyq mán-jaiyn zerdeleý jáne grýzin tarapymen sotqa deiingi tergeý materialdary boiynsha aqparat almasý», - dedi Nurdildá Oraz Ishki ister ministrliginde ótken baspasóz máslihaty barysynda.
Onyń atap ótýinshe, Nur-Sultan qalalyq politsiia departamenti Grýziiada qaitys bolǵan Qazaqstan azamatshasy Á.Aitpaevanyń ata-anasynyń shaǵymymen azmat M.Meiirbekovke qatysty QR Qylmystyq kodekstiń 128-babymen sotqa deiingi tergeý amaldaryn bastady.
«Kúdikti ustalyp, Nur-Sultan qalalyq PD ýaqytsha oqshaýlaǵyshyna qamaldy. Tergeý amaldary júrgizilýde. Sotqa deiingi tergeý jalǵasyp jatyr», - dedi ol.
Eske sala keteiik, 26 jastaǵy Ásel Aitpaevanyń denesi 5 mamyr kúni Tbilisi qalasyndaǵy bir úidiń terezesiniń astynan tabylǵan edi. Ol 9-qabattan qulap mert bolǵan.
Keiinnen Grýziia prokýratýrasy qazaqstandyq qyzdy zorlaý jáne óz-ózine qol jumsaýǵa itermeleý isi boiynsha aiyptaý shyǵardy.
16 mamyr kúni Nur-Sultan qalasynyń politsiia departamentinen málim etkendei, boijetkenniń ata-anasynyń aryzy boiynsha onyń týysy M.Meiirbekov ustalyp, oǵan qatysty Qylmystyq kodekstiń 128-babymen (adam saýdasy) sotqa deiingi tergeý bastaldy.
