Grýziianyń arnaiy penitentsiarlyq qyzmetiniń málimetinshe, Qazaqstan azamatshasyn zorlady dep aiyptalǵan Tordýanyń óliminiń boljamdy sebebi - mi infarktisi.
Qyzmettiń habaryna sensek, aiyptalýshy 28 mamyrda penitentsiarlyq mekemege túsken kezde meditsinalyq tekserý júrgizilip, arteriialyq gipertenziia diagnozy qoiylǵan. Osyǵan bailanysty ol meditsina qyzmetkerleriniń baqylaýynda boldy.
Grýziiadaǵy qazaqstandyq qyzdyń ólimine qatysty is boiynsha tergeýge Qazaqstannan mamandar tartylyp jatyr.
30 maýsymda Tordýa dárigerge basy qatty aýyryp jatqanyn aitqan. Aiyptalýshynyń sóileý qabileti buzylyp jáne qan qysymy joǵarylai bastaǵan. Tordýa midyń qan aǵymy buzylýyna bailanysty jedel járdemmen klinikaǵa jetkizildi.
Klinikada júrgizilgen midyń kompiýterlik tomografiiasynyń nátijeleri jáne nevropatologtyń keńesi boiynsha: mi infarktisi diagnozy qoiyldy.
"Jaǵdaiy aýyr bolýyna bailanysty aiyptalýshy reanimatsiia bólimine jatqyzyldy, em qabyldap, qarqyndy baqylaýda boldy. Neirohirýrgtiń baqylaý keńesi nátijesinde shuǵyl hirýrgiia qajet boldy. Operatsiiadan keiin naýqastyń jalpy jaǵdaiy aýyr bolyp qaldy, gemodinamika kórsetkishteri turaqsyz", - delingen penitentsiarlyq qyzmettiń habarlamasynda.
Em-domǵa qaramastan, naýqastyń jaǵdaiy nasharlap, 14 shildede júrek soǵysy buzylyp (bradiaritmiia), ol kóp uzamai asistoliiaǵa ainalyp - júrek jumysy toqtady.
"Júrek-ókpe reanimatsiiasy hattamaǵa tolyq sáikes bastaldy, biraq júrektiń mehanikalyq fýnktsiiasyn qalpyna keltirý múmkin bolmady. Biologiialyq ólim tirkeldi", - delingen habarlamada.
Eske salaiyq, buǵan deiin Grýziiada 26 jastaǵy qazaqstandyq Ásel Aitbaevanyń jumbaq jaǵdaida qaitys bolǵany habarlanǵan edi. Marqumnyń ápkesiniń sózinshe, Ásel oqiǵa qarsańynda qurbysyna aýdiohabarlama jiberip úlgergen. Aýdioda belgisiz er adam oǵan qoqan-loqy kórsetip jatqany estiledi.
Al keshe, 15 shildede Ásel Aitbaevany zorlady dep aiyptalǵan Besik Tordýa klinikada qaitys bolǵany anyqtaldy. Onyń advokaty Lasha Shýkakidze bul aqparatty rastady jáne onyń klienti bir apta buryn penitentsiarlyq mekemeden aýrýhanaǵa jatqyzylǵanyn aitty.
