Shahmatshy Bibisara Asaýbaeva Qazaqstan shahmat federatsiiasy basshylyǵynyń ýájinen keiin ótirik aitpaǵanyn dáleldeý úshin detektordan ótýge daiyn ekenin málimdedi. Ol shahmat federatsiiasynyń basshylyǵyn da detektordan birge ótýge shaqyrdy.
21 maýsymda Bibisara Asaýbaeva áleýmettik jelidegi paraqshasyna shahmat federatsiiasy "Prezident ákimshiliginen aqsha suraýǵa tanymal sportshylardy paidalanady" dep málimdegen bolatyn.
"Bizdi ministrmen kezdesýge sát-sapar tileý úshin aparatynyna sońǵy sátke deiin sendim. Sóitsek Dármen Sádýaqasov pen onyń bastyǵy bizdi Qazaqstan shahmat federatsiiasynyń biýrokrattaryna 3 milliard teńge suraýǵa ákelipti. Osy arsyz spektaklge qatysqanyma qatty uialamyn" dep jazǵan Bibisara Asaýbaeva Instagram paraqshasyna.
Onyń postyna Qazaqstan shahmat federatsiiasy reaktsiia bildirgen. Federatsiia basshysy Ǵalym Qusaiynov "Ózbekstanda shahmatty qalai qarjylandyratyny týraly mysal úshin aitylǵan sózdi Asaýbaeva durys túsinbegen" dep sanaidy.
Qazaqstan shahmat federatsiiasy basshysynyń nusqasyn taǵy bir tanymal shahmatshy Jansaia Ábdimálik qaitalaǵan.
"Úsh milliard týraly eshqandai sóz bolǵan joq. Ózbekstan shahmat federatsiiasyn mysalǵa aldyq. Olarǵa jylyna 3 million dollar bólinetinin aittyq. Sonyń arqasynda Ózbekstan qazir álem reitigginde 37-orynda tur. Bibisara bálkim shatastyrǵan shyǵar nemese muqiiat tyńdamaǵan bolar", - deidi Jansaia Ábdimálik.
Jansaia Ábdimáliktiń pikirinen soń Bibisara Asaýbaeva áleýmettik jelidegi paraqshasyna "eshteńe de shatastyrmaǵanyn" qaita jazdy.
"Eshqashan eshteńeni shatastyrmaimyn, oidan da shyǵarmaimyn. Sport ministri aitqandai, emotsiiamen de qadam jasamaimyn. Elimizdiń prezidentinen túrli jeleýmen surap otyrǵan úsh milliard teńge (nemese Hýsainov myrzalaryńyz aitqandai úsh million-aq bola qoisyn) – óte úlken soma, oǵan federatsiianyń da eńbegi sińgen joq", - dep jazdy Bibisara Asaýbaeva 26 maýsymda.
"Ótirik aitý máselesine oralaiyq. Jattyǵýda júrsem de ýaqyt taýyp, poligraf tekserisinen ótýge daiynmyn. Hýsainov pen Sádýaqasov myrzalar ýaqyty men ornyn belgilep, menimen birge detektordan ótsin. Úsh adamnyń aqshasyn ózim-aq tóleimin", - dep málimdedi Bibisara Asaýbaeva.
Byltyr jeltoqsanda Bibisara Asaýbaeva Polshada shahmattan blits boiynsha álem chempionatynda altyn alǵan (júris oilastyrýǵa shekteýli ýaqyt beretin shahmat oiyny). Qazaqstan sportynda muny tarihi jetistik dep baǵalaǵan. Óitkeni Asaýbaeva shahmat tarihyndaǵy álemniń eń jas chempiony bolǵan. Sondai-aq, sáýir aiynda Bibisara Asaýbaeva áielder arasyndaǵy eń jas álem chempiony retinde Ginnestiń rekordtar kitabyna engen.
