Búgin Ál-Farabi atyndaǵy QazUÝ-de QR Bas Prokýrory Jaqyp Asanov stýdenttermen jáne ustazdarmen kezdesti. Ol stýdenttik shaǵy osy qara shańyraqta ótkenin, jáne bul oqý ordasy Qazaqstandaǵy úzdikterdiń biri ekenin jetkizdi, - dep habarlaidy "Ult aqparat" Bas Prokýratýranyń baspasóz qyzmetine silteme jasap.
Kezdesýde Bas Prokýror jańa jumysqa kiriskende kadr tańdaý máselesine basa nazar aýdarǵanyn aitty. "Jastar arasynda saýalnama júrgizdik. Stýdentterdiń 95 paiyzy tanysyń, aǵań, kókeń bolmasa prokýratýraǵa turý múmkin emes dep jaýap bergen. Osy kózqarasty biz ózgerttik. Qazir esh tanyssyz, bailanyssyz bizge jumysqa turýǵa bolady. Eki konkýrs ótti. 2 myń kandidattyń ishinen tek 126-sy jumysqa qabyldandy. Onyń 21-i, árbir altynshysy, osy Ýniversitettiń túlegi. Sondyqtan sizderdi quttyqtaimyn» dep jinalǵandardyń kóńilin kóterip tastady", - dedi Jaqyp Asanov.
Sondai-aq, Jaqyp Asanov jastarmen táýelsizdik jetistikteri turǵysynda oiymen bólisti. Egemendiktiń qadiri, shekara mártebesi jáne Astananyń qarqyndap damýy - jastardyń qolyndaǵy basty bailyq ekenin shegelep aitty. Sonymen qatar, Bas prokýror adamdardyń ómir súrý deńgeiin 90-shy jyldarmen salystyryp berdi.
Onyń aitýynsha, ómir súrý uzaqtyǵy 67 jastan 72-ge uzardy; bir jylda 350 myń bala týylsa, qazir 400 myń bala dúniege keledi; bala ólimi 2 ese azaisa, ana ólimi 6 ese tómendegen jáne 1 million qandasymyz elimizge oralǵan.
QR Bas prokýrory osy jetistikter men qundylyqtardy saqtap qana qoimai, júrgen jerde ony aityp, taratyp júrý - ár azamattyń paryzy ekenin jetkizdi.
Kezdesý barysynda Elbasy joldaýynda aitylǵan basty baǵyttar da qozǵaldy. Bas Prokýror bul ózgeristerdiń jerdi satýǵa múldem qatysy joqtyǵyn eskertti. Eshqandai jer ózgege berilmeitinin shegelep aitqan Jaqyp Asanov jurtshylyqty qańqý sózge ermeýge shaqyrdy. Sondai-aq, ol qoǵamǵa iritki salýǵa qumarlardyń áreketine jol berilmeitinin jetkizdi.
Jaqyp Asanov sóz sońynda stýdentterge aqyl-keńesterin berdi. Bilim alyp, kóshbasshy bolýǵa talpyný qajettigin aityp, kitap kóp oqýǵa keńes berdi.
