Májilistiń plenarlyq otyrysynda sóilegen Qazaqstan bas prokýrory Jaqyp Asanov quqyq qorǵaý organdary salasy qyzmetkerleriniń sanasyna sińip qalǵan jaǵymsyz ádetter týraly aitty, dep habarlaidy "Ult aqparat" Baq.kz aqparat agenttigine silteme jasap.
«Bizdiń organdarda bir eski aýrý bar. Biz ózimizdi qylmystyq istiń iesi sanaimyz. Sóitip, kúdiktiniń taǵdyryn qolda ustap otyrǵanymyzǵa maqtanamyz. Bul keńes zamanynan kele jatqan aýrý, sanamyzǵa sińgen ádet, qalyptasqan mentalitet. Men muny moiyndaimyn, óitkeni 1986 jyldan quqyq qorǵaý júiesinde jumys istep kele jatyrmyn. Budan qalai aryla alamyz?», - dedi Asanov.
Ol basqa elder siiaqty qylmystyq isti tsifrlaý qajettigin aitty. Munyń mańyzyn bas prokýror bylai túsindirdi.
«Biz áriptesterimizdi qatelikten saqtap, túrmeden qorǵaimyz. Ókinishke qarai, isti bolyp jatqan áriptesterimiz óte kóp. Máselen, bir jylda ustaǵan prokýrorlardyń kóptigi sonsha, biz 15 jylda munsha prokýrordy ustaǵan emespiz. Bizge bul ońai emes. Biraq solai isteýge tiispiz. Bas prokýratýraǵa aryz jazsa, biz isti aimaqtan suraimyz. Ol bizge jetýi úshin eki apta kerek. Sosyn tergeýshi de barlyq qujatty jibermeidi. Óziniń kemshilikterin jasyrý úshin ol kei qujattardy alyp qalady. Sosyn men oǵan sene almaitynymdy, kei faktiler men dálelder onyń seifinde qalǵanyn aitam. Tsifrly format eń áýeli qylmystyq iste tártip ornatady, osylaisha qyzmetkerlerdiń sanasynda ózgeris bolady», - dedi ol.
Jaqyp Asanov osy arqyly jurtshylyqtyń senimine ie bolýǵa múmkindik týatynyn aitady. Bas prokýratýra 2018 jyly qylmystyq protsesti túgel tsifrlaýdy josparlap otyr.
«Aryz kelip túsken ýaqyttan bastap, tergeý barysy, istiń sotta qaralýy jáne jazanyń oryndalýyna deiin qamtimyz. Iaǵni árbir iske qatysty sot aldy tergeýden bastap, nemese jazasyn óteýge ketkenge deiingi búkil protsess tsifrlanady. Menińshe, bul jaqsy nátije beredi. Bizge kelgen sheteldik sarapshylar mundai tájiribeniń Saýd Arabiiasy, Litva, Grýziiada da bar ekendigin aitty. Biraq ol jaqta tek sotqa deiingi tergeý tsifrlanady», - dedi Asanov.
Májiliste talqylanyp jatqan quqyqqorǵaý qyzmetiniń protsessýaldy negizderin jańǵyrtý máselelerine bailanysty QR keibir zańnamalyq aktilerine ózgerister men tolyqtyrýlar engizý týraly» zań jobasy QR QPK, «Shuǵyl izdestirý qyzmeti týraly», «Prokýratýra týraly» zańdaryna ózgerister men tolyqtyrýlar engizýdi qarastyrady. Usynylǵan túzetýler qylmystyq protseste azamattardyń qorǵanysh deńgeiin joǵarylatýǵa, qylmystyq isterdi tergeý protsedýralaryn jeńildetýge, advokattardyń protsessýaldy múmkindikterin keńeitý arqyly qylmystyq protseste jaryspalylyqty joǵarylatýǵa, sotqa deiingi kezeńde sot baqylaýyn odan ári keńeitýge baǵyttalǵan.
