Foto: kolesa.ru
Úkimet basshysy Álihan Smaiylov janar-jaǵarmai baǵasyna qatysty málimdeme jasady, dep habarlaidy QazAqparat.
«Keshe Energetika ministrligi elimizde janar-jaǵarmai baǵasynyń ósetinin málimdedi. Osyndai sheshim qabyldaýǵa májbúr boldyq. Iaǵni, baǵany qaita qaramasaq, onda jaqynda munai ónimderiniń tapshylyǵyna tap bolamyz. Bizde dizel otynyn qoldaný jylyna bir adamǵa 300 litrden keledi. Al Reseide bul kórsetkish - 225 litr, Qyrǵyzstanda - 90 jáne Ózbekstanda - 44 litr. Memleket janar-jaǵarmai óndirisin ulǵaitý boiynsha tiisti sharalar qabyldaýda. Sońǵy bes jylda benzin óndirisi 70 paiyzǵa, al dizel otyny 33 paiyzǵa ósti», - dedi Álihan Smaiylov Úkimet otyrysynan keiin BAQ ókilderine málimdeme jasai turyp.
Onyń aitýynsha, munai kompaniialary joǵary qarqynmen jumys istep jatyr.
«Degenmen janar-jaǵarmai naryǵynda tapshylyq máselesi azaiar emes. Qazaqstandyq arzan janar-jaǵarmai ártúrli jolmen kórshi elderge ketip jatyr. Osylaisha otandyq arzan janar-jaǵarmai ózimizdiń múddesine emes, kórshi memleketterdiń ekonomikasyna jumys istep otyr», - deidi Premer-Ministr.
