Qazaqstan ulttyq mýzeiiniń direktory, burynǵy mádeniet jáne sport ministri Arystanbek Muhamediuly jelidegi paraqshasynda ózine qatysty negizsiz tekserýler bastalǵanyn málimdep, Prezident Qasym-Jomart Toqaevtan arasha surady, dep habarlaidy "Ult aqparat".
"Men eńbek jolyn qazaqtyń kórnekti ǵalymy, akademik Ahmet Jubanov negizin qalaǵan Memlekettik filarmoniiadan bastadym. Bertin kele «Qazaq áýenderi» Aktsionerlik Qoǵamyn quryp, menedjmentke erekshe den qoidym. Kóptegen daryndy jastarmen tanystym. Birlesip, keremet entýziazmmen jumys istedik.
Toqsanynshy jyldardyń sońyna qarai álemdik mýzykalyq mádeniettiń barlyq janrlaryn qamtityn, Qazaqstannyń Prezidenttik orkestriniń irgesin qaladym. Maǵan elimizdiń eń talantty degen ókilderin jinaýǵa múmkindik berildi. Bul jumysty meilinshe abyroimen atqarýǵa tyrystym. 2006-2007 jyldar - Qazaqstan Respýblikasy Mádeniet jáne aqparat vitse-ministri, 2007-2008 jyldary Qazaqstan Respýblikasy Prezidenti Ákimshiligi Ishki saiasat bóliminiń bas inspektory qyzmetterin atqardym. Budan keiin T. Júrgenov atyndaǵy Qazaq ulttyq óner akademiiasynda rektor bolyp jumys istedim.
Ónerdiń ár salasynda adal atqarǵan qyzmetim el basshylyǵy tarapynan eleýsiz qalmasa kerek, Mádeniet jáne sport ministri laýazymyna taǵaiyndaldym. 2019 jyldyń shildesinen Sizdiń Ókimińizben Qazaqstan Respýblikasy Ulttyq mýzeiiniń direktory bolyp jumys jasap kelemin", - dep jazdy ol.
Muhamediuly óz úndeýinde negizsiz tekserilip jatqanyn atap ótti.
"Alystan Alash dese attanamyn,
Qazaqty qazaq dese maqtanamyn.
Bolsa da ákem qazaq, sheshem qazaq,
Men nege qazaqtyqtan saqtanamyn – dep Mirjaqyp babamyz jyrlaǵandai men ózimniń búkil sanaly ómirimdi Qazaq Eliniń, ultymyzdyń igiligine jumsap kelemin. Qazaqtyń AR-NAMYSY, MAQTANYShY, QASIRETI – JELTOQSAN desek, Qairat Rysqulbekov sekildi onyń jaýjúrek qaharmandary elimizdiń keleshegi úshin ómirlerin qidy. Meniń de bar armanym sol – Qazaqstannyń jarqyn bolashaǵy!
Munyń bárin men nege baiandap otyrmyn? Qai salada jumys jasamaiyn, men áýeli ult múddesi úshin ter tógip júrgenimdi aitqym keledi. Memleket biýdjetine qol salǵandarǵa aiaýsyz tosqaýyl jasap kelemin. Árine, mundai áreketterim keibir adamdarǵa unasyn ba? Keibir adamdar áli kúnge deiin tirlikterime tuzaq quryp keledi.
Osydan birneshe jyl buryn "Feniks" kórkemfilminiń túsirilimderine bólingen qarajattyń jymqyrylǵany belgili. Naqtylap aitqanda, «Feniks» kinojobasy boiynsha biýdjet qarjysyn jymqyrdy degen kúdik keltirilip, kinorejisser Talǵad Janybekov qamaýǵa alyndy.
Oǵan qazaqstandyq belgili akter ári prodiýser Tuńǵyshbai Jamanqulovtyń da tikelei qatysy bolatyn. "Feniks" filminiń sharty gollivýd kompaniiasy "Aldamisa Entertainmentpen" jasalyndy degen sóz jalǵan bolyp shyqqan edi. Shyn máninde, "Kazahfilm" AQ "T.K.TURAN UNIVERSAL BUSSINES" JShS-pen jáne reseilik OOO "Aldamisa RÝS" jasandy kompaniiasymen kelisim jasalyp, biýdjetten bólingen 3 mln. dollar qoldy bolyp kete jazdaǵan.
Sol T. Jamanqulov óz qorǵaýshysynyń kózinshe "Feniks" filminiń óndirisine bólingen biýdjet qarajatyn jymqyrǵanyn tolyqtai moiyndady. Jamanqulov qarajattyń qolma-qol aqshaǵa ainaldyrylǵan deregin de rastady jáne biýdjet qarajatynyń jeke maqsattarǵa jumsalǵanyn aitty.
Alaida, atalǵan óner ókilderi túrli aila-sharǵylarymen meni qaralaýǵa kóshken bolatyn.
Prodiýsser Tuńǵyshbai Jamanqulov aiybyn betine basqanym úshin, meni ata jaýyndai kórip, kúni búginge deiin jón-josyqsyz aryzdanyp keledi. Árine, «qaharmandar» azýyn kórsetýden qaitar emes. Kez-kelgen ilkimdi sátti paidalanyp, Ózińizdiń atyńyzǵa, basqa da qurylymdarǵa esh negizi joq shatpaq shaǵymdaryn sharshamai jazyp keledi. Onyń tý syrtynda kezinde Dariǵa Nazarbaevanyń, Baǵlan Mailybaevtyń, Ermek Amanshaevtyń turǵanyn jáne de solardyń aitaǵy ekeni de belgili. Álbette, qisapsyz tekserý, tergeý amaldary da júrdi. Biraq, meniń ar-ujdanym taza! Jeke basymdy qaralaǵan birde-bir fakt dáleldenbedi.
Keiingi kezde, endi aryz ieleri mýzeide ketken buryńǵy kinárattardy da maǵan japsyra salǵysy keledi. Osyǵan orai, negizsiz tekserýlerge tosqaýyl bolýyńyzdy suraimyn!", - dep túiindedi Arystanbek Muhamediuly.
