Qazaqstandyq shańǵyshy Aleksei Poltoranin qan dopingin qoldanǵan joq. Bul týraly búgin Úkimet otyrysynan keiingi baspasóz máslihatynda Mádeniet jáne sport ministri Arystanbek Muhamediuly málim etti, dep habarlaidy QazAqparat tilshisi.
Onyń aitýynsha, Mádeniet jáne sport ministrligi WADA-ǵa arnaiy suranys jiberip, atalǵan agenttik qazaqstandyq sportshy tarapynan doping qoldanýǵa umtylý áreketiniń bolǵandyǵyn rastaǵan.
«Baqytymyzǵa orai, Poltaranin qan dopingin qoldanbaǵan. Biraq Germaniiada dárigerge baryp, qan tapsyrǵan. Bul dáleldengen. Qazir advokattarmen jáne zańgerlermen bailanysyp otyrmyz. Sportshynyń kinási doping paidalaný emes, ony paidalanýǵa árekettený. Bas jattyqtyrýshy da qan quidyrmaǵanyn aityp otyr. Óz qanyn qabyldaý bolǵan joq. Avstriialyq politsiia qyzmeti de resmi málimdedi. Biz suranys jibergen edik», - dedi ministr.
Sonymen qatar, ol «sportqa qarsy áreketke» barýǵa túbegeili qarsy ekendigin basa aitty.
«Sport salasyndaǵy zańnamaǵa ózgertýler engizemiz. Normalar, kim doping qoldansa, soǵan jaza qarastyrady. Bizdiń ustanymymyz aiqyn - dopingke qarsymyz. Ol esh ýaqytta jaqsylyqqa aparmaidy. Medal sońynan qýý túbinde áshkere bolady. Onyń bizge qajeti qansha? London Olimpiadasy bolǵanda 7 medal alǵan sportshylarymyzdy qurmettedik. Sodan keiin 4 altyn medaldy qaitaryp aldy. Mundai faktilerdiń qajeti qansha? Sondyqtan zańnamaǵa qatań norma engizemiz», - dedi Arystanbek Muhamediuly.
Esterińizge salsaq, 27 aqpanda nemis jýrnalisi Haio Zeppelt Tvitterinde Avstriianyń Zeefelde qalasynda shańǵy jarysynan ótip jatqan álem chempionatynda Qazaqstan, Avstriia men Estoniia sportshylary antidopingtik erejelerdi buzdy degen kúdikke ilingenin jazdy. Olardyń qatarynda Aleksei Poltoranin da bar edi.
Sondai-aq, ministr baspasóz máslihatynda Almaty oblysyndaǵy taý shańǵysy kýrorttary bir aspaly jolmen bailanystyrylatynyn aitty.
«Eń aldymen Almaty oblysynda taý shańǵy sportyn damytamyz. Qazir Shymbulaqta adam óte kóp. Onyń janynda Tabaǵan bar. Orman ertegisi degen jerden taý shańǵysyna arnalǵan taǵy bir kýrort salynyp jatyr. Talǵar aýdanynda Aqbulaq bar. Bizdiń endigi maqsatymyz - olardyń barlyǵyn bir aspaly jolmen biriktirý», - dedi ministr.
Onyń aitýynsha, Almaty oblysyndaǵy taý shańǵysy kýrortyna demalýǵa kelgen adamdar jol mashaqatyn tartyp jatady. Máselen, Shymbulaqqa barý úshin búkil qalany basyp ótip, Medeýge baryp, odan keiin ǵana dittegen jerine jetedi.
«Al endi áýejaiǵa kelgen adam 10 shaqyrym jerdegi Besqaraǵaiǵa nemese Aqbulaqqa barady. Ol jerde qonaqúi, barlyǵy ornalasady. Odan keiin aspaly jolǵa otyryp Shymbulaqqa, Tabaǵanǵa bara alady. Qazir taý shańǵysy úshin Ońtústik Koreia men Eýropadan óte kóp adam Almatyǵa keledi. Alataý bizdiń jumaǵymyz desek te bolady, áppaq qar bar, kún jarqyrap turady. Basqa elderge barsań, sýyq», - dedi Arystanbek Muhamediuly.
