QR Mádeniet jáne sport ministri Arystanbek Muhamediuly Memleket basshysy qol qoiǵan Qazaqstan tarihyndaǵy alǵashqy «Kinematografiia týraly» zańnyń otandyq kinoónerge ne beretinin aityp berdi, dep habarlaidy QazAqparat tilshisi.
Astanada ótip jatqan QR Mádeniet jáne sport ministrliginiń keńeitilgen alqa májilisinde Arystanbek Muhamediuly óz basqarýyndaǵy vedomstvo ulttyq kinonyń damýyna erekshe kóńil bólip kele jatqanyn atap ótti.
«Memleket basshysy Qazaqstan tarihyndaǵy alǵashqy «Kinematografiia týraly» zańǵa qol qoidy. Kinoqaýymdastyq úshin jáne qazaqstandyqtar úshin bul tarihi oqiǵa boldy. Biz barlyq progressivti álemde kinoóner - qoǵamnyń damýyna jáne qoǵamdyq sananyń qalyptasýyna yqpal ete otyryp, orasan zor áleýmettik jáne ideologiialyq áserge ie ekenin jaqsy túsinemiz. Ekinshiden, qazaqstandyq kinony jappai prokatta ilgeriletýge járdemdesetin jáne onyń sheteldik filmder aldynda basymdyǵyn qamtamasyz etetin jáne úshinshiden, ulttyq kinoǵa álemdik kinoǵa shyǵýǵa múmkindik beretin zań qabyldandy», - dedi ministr.
Arystanbek Muhamediuly óz baiandamasynda áleýmettik jelide taraǵan aqparattardan da habardar ekenin bildirdi.
«Bizde zańdy oqymaǵan keibir azamattar biik minberden sóz sóilep, qaljyńmen shabýyl jasaǵysy keledi. Al shyntýaityna kelgende bul zań - biregei. Men sizderge senimdi túrde 1-2 jyldan keiin qazaq kinosy halyqaralyq deńgeide jarqyraitynyn aitqym keledi. Sebebi, bul zań barda, bizdiń keremet rejisserlerimiz ben akterlerimiz barda myqty týyndylar ómirge keleri anyq», - deidi ministr.
Arystanbek Muhamediuly jańa zań boiynsha ulttyq kinolarǵa mańyz beriletinin atap ótti.
«Bizdiń ulttyq kino 12 paiyzdyq qosymsha qunǵa salynatyn salyqtan bosatylady. Kino túsirip júrgender mundai jeńildiktiń mańyzyn biledi. Biz zańda Frantsiia, AQSh, Resei men Qytai, Ońtústik Koreia sekildi kinoóndirisi damyǵan elderdiń tájiribesin negizge aldyq», - dedi Arystanbek Muhamediuly.
