© Sputnik
Arys qalasynda bolǵan jarylystan zardap shegip, ótemaqy ala almai qalǵan 48 kásipkerlik nysanǵa ótemaqy beriletin boldy. Premer-ministrdiń birinshi orynbasary Roman Skliar biznesmenderdiń máselesin sheshýdi Túrkistan oblysynyń ákimdigine tapsyrdy, dep habarlady Sputnik Qazaqstan agenttigi "Atameken" UKP baspasóz qyzmetine silteme jasap.
Osydan 3 jyl buryn Arysta áskeri qoimadaǵy qarý-jaraq jarylǵan kezde jaqyn mańdaǵy 464 biznes nysany zardap shekkeni belgili bolyp, olar ótemaqy alǵan. Ótemaqy "Meniń Atamekenim" qoǵamdyq birlestigi arqyly ashylǵan ("Biznes bizneske" jobasy) arnaiy qaiyrymdylyq esepshotynan berildi.
"Qaiyrymdylyq qarajatynyń somasy 3,1 milliard teńgeni qurady. Onyń ishinde "Meniń Arysym" jobasy aiasynda eldegi shaǵyn jáne orta biznes sýbektilerinen jinalǵan 90 million teńge bar. Jinalǵan qarjy 416 nysanǵa keltirilgen zalal úshin tólendi", - delingen habarlamada.
Jinalǵan qarjy týraly tolyq esep, obektilerdiń mekenjaiy, alynǵan ótemaqylardyń somasy jáne ótemaqy alǵan kásipkerlerdiń tizimi IIDM, Túrkistan oblysynyń ákimdigine jáne Arys qalasynyń ákimdigine usynyldy. Sonymen qatar ótemaqysyz qalǵan 48 obektiniń tizimi de atalǵan vedomstvolarǵa jetkizildi.
"Atameken" UKP qalǵan 48 nysanǵa ótemaqy tóleý máselesin birneshe ret kóterdi. 2021 jyly ortalyq memlekettik organ, jergilikti atqarý organynyń ókilderimen kezdesip, máseleni sheshý usynystary aityldy. Budan basqa, Ulttyq ekonomika ministrligine Arys qalasyndaǵy tótenshe jaǵdaidan zardap shekken kommertsiialyq obektilerge shyǵyndardy qalpyna keltirý, óteý jónindegi is-sharalar josparyna birqatar usynys jiberildi. Bul usynystar paketi qoldaý tapty.
2022 jyly Ulttyq palata basshylyǵy kásipkerlerdiń bastamashyl tobymen birneshe ret kezdesti. Osy jyldyń 6 mamyrynda premer-ministrdiń birinshi orynbasary Roman Skliardyń tóraǵalyǵymen beinekonferentsbailanys rejiminde keńes ótti. Nátijesinje Túrkistan oblysynyń ákimdigine qalǵan 48 nysanǵa ótemaqy tóleý máselesin sheshý týraly tapsyrma berildi.
