Arys qalasyndaǵy áskeri qoimada 2019 jyly bolǵan jarylysqa kináli dep tanylǵan 16 adam túrli merzimge bas bostandyǵynan aiyryldy, dep habarlaidy "Ult aqparat".
Sot úsh adamnyń ómirin qiyp, 30 adamnyń jaraqat alýyna sebepker bolǵan Arystaǵy jarylys boiynsha qaralǵan qylmystyq istiń qorytyndysyn shyǵardy.
Shymkent garnizony áskeri sotynyń baspasóz qyzmeti taratqan málimet boiynsha, prokýrorlar sottalýshylarǵa 4 jyldan 10 jylǵa deiin bas bostandyǵynan aiyrý jazasyn taǵaiyndaýdy jáne azamattyq talaptardy qaraýsyz qaldyrýdy suraǵan.
Al jábirlenýshilerdiń kóbi istiń kúrmeýin sottyń uiǵarymyna qaldyrýǵa niet bildirgen.
«Aiyptalýshy tarap pen onyń advokattary kúdikti retinde tartylǵan azamattardy aqtap, qylmystyq isti toqtatýdy surady. Qorǵanys ministrligi men áskeri bólimniń basshylyq quramy qyzmetke nemquraidy qaraǵany úshin (Qylmystyq kodekstiń 453-baby 2-bóligi), atap aitqanda, qyzmettik mindetterdiń oryndalýyn baqylaý jónindegi sharalardy qoldanbai, oq-dárimen jumys isteý erejesin buzǵany úshin (QK 462-baby 3-bóligi) kináli dep tanyldy», - dep jazady sottyń baspasóz qyzmeti.
Sottalǵandardyń ishinde eń uzaq merzimdi áskeri maqsatqa bólingen qarajatty jymqyrdy dep aiyptalǵan kúdiktelir arqalady. Naqtyraq aitsaq, aýdandyq paidalaný bóliminiń basshylyǵy men áskeri bólim komandiri tehnikalyq kúzet qualdaryn montajdaýǵa bólingen biýdjet aqshasyn jymqyrǵany úshin 7 jáne 10 jylǵa bas bostandyǵynan aiyryldy. Qosymsha jaza retinde atalǵan tulǵalarǵa memlekettik qyzmet pen kvazimemlekettik sektorda laýazymdy qyzmet atqarýǵa tyiym salyndy.
Sotqa ispen birge usynylǵan azamattyq talaptar qaraýsyz qaldyryldy. Istiń bul bóliginde jóndeý jumystaryn júrgizgen merdiger uiymdar men menshik ieleri arasyndaǵy daýdyń bolýyna bailanysty azamattyq sot óndirisine júginý usynyldy.
«Sot úkimi áli zańdy kúshine engen joq. Taraptar onymen kelispegen jaǵdaida Qylmystyq is júrgizý kodeksiniń 31-baby boiynsha joǵary turǵan sotqa shaǵym berýge quqyly. Qylmystyq is 550 tomnan turdy. Is boiynsha 1 473 jábirlenýshiden jaýap alyndy. Sotqa qatysýshylardyń kóptigine jáne sot otyrystaryn soǵan sai zalda ótkizý qajettiligine bailanysty is rejimdik obekti – áskeri bólimde qaraldy. Onyń aýmaǵyna azamattardy jiberý nysannyń qolbasshylyǵynyń ruqsatymen ǵana iske asyryldy», - dep jazylǵan resmi málimette.
Shymkent garnizony áskeri sotynyń baspasóz qyzmeti úkimdi jariialaý kezinde onlain qatysý múmkindigi usynylmaǵanyn málimdep otyr.
Oǵan áskeri nysannyń janynda qylmystyq atqarý júiesiniń mekemesi turýy sebep bolǵan.
«Atalmysh nysanda uialy bailanysty tejeitin qondyrǵy ornatylǵan. Sondyqtan úkim oqý kezinde onlain qosylýǵa tehnikalyq múmkindik bolmady», - dep jazady sottyń baspasóz qyzmeti.
