Jarylystan zardap shekken Arys qalasy turǵyndaryna batysqazaqstandyqtar da qolushyn sozdy, dep habarlaidy "Ult aqparat".
Oral qalasynda úsh jerde kómek kórsetý ortalyqtary ashyldy.
Qazirgi ýaqytta osy oryndarda (N.Nazarbaev dańǵyly, 188, 1-qabat, 101-kabinet, Qadyr Myrza Áli, 18, 3-qabat, «Bastaý» kovorking ortalyǵy jáne J.Moldaǵaliev kóshesi, 19, 1-qabat, 109-kabinet) Arys turǵyndaryna asa qajetti zattar jinaqtalýda.
Oblys ákiminiń orynbasary Ǵabidolla Ospanqulov óńirde qazirdiń ózinde 15-20 iri kásiporyn Arysqa demeýshilik kórsetip jatqandyǵyn jetkizdi. Sonymen qatar oblys ákimdigi, «Nur Otan» partiiasy BQO filialy jáne basqa memlekettik mekemeler qyzmetkerleri óz erikterimen bir kúndik jalaqylaryn aýdarmaqshy.
Oblystyq kásipkerlik jáne indýstrialdyq-innovatsiialyq damý basqarmasynyń bólim basshysy Meiram Qabdyǵalievtiń aitýynsha, búgin alǵashqy júk kóligi attanbaqshy. Onda 4 tonna astyq, 5 tonna makaron jáne basqa azyq-túlik ónimderi tielgen. Arysqa sondai-aq qurylys materialdary da jetkizilmekshi. Buǵan «Kýblei», «Jaiyq et», «Oral transformator zaýyty», «Terekti mai» syndy kásiporyndar óz úlesterin qosýda.
