Arystaǵy jarylysqa qatysty áskeri bólimniń komandiri men onyń orynbasary qamaýǵa alyndy, dep habarlaidy "Ult aqparat" Ishki ister ministrliginiń baspasóz qyzmetine silteme jasap.
«2019 jyldyń 23 tamyzynda IIM Tergeý departamentiniń qylmystyq ister jónindegi Áskeri-tergeý basqarmasymen Arys qalasyndaǵy arsenaldyń jarylý faktisi boiynsha áskeri bólimniń komandiri men onyń orynbasary – artilleriialyq qarý-jaraq saqtaý bazasynyń bastyǵy ustaldy», - delingen IIM habarlamasynda.
Ustalǵan kúdiktiler QR QK 462-baby 3-bóliginde qarastyrylǵan (jarylǵysh zattardy ustaý erejelerin buzý), 453-baby 2bóligi (aýyr zardapqa aparyp soqqan nemqurailylyq) boiynsha qamaýǵa alynǵan.
«Búgin Túrkistan oblysy Arys aýdandyq sotymen atalǵan adamdardy 2 aiǵa «Qamaýǵa alý» sharasy qabyldandy. Sotqa deiingi tergeý júrgizilip jatyr», - dedi IIM.
Eske sala ketsek, Arys qalasyndaǵy áskeri bólimniń qoimasynda 24 maýsym kúni tańerteń jarylys boldy. Saldarynan úsh adam qaza tapty - Arys turǵyny men eki áskeri qyzmetshi. 170-ke jýyq adam zardap shekti. 20-ǵa jýyq úi, 9 qora-qopsy janyp, dalaly aýmaqta 14 oshaq tutandy. Úi-jailar men ǵimarattardyń 80-90 paiyzyna ártúrli deńgeide zaqym keldi. Birqatar óńirde shuǵyl jeliler quryldy.
Túrkistan oblysyna arnaiy barǵan Qazaqstan Prezidenti Qasym-Jomart Toqaev Arystaǵy áskeri bólimshedegi oq-dári qoimasyndaǵy jarylystan zardap shekken qala turǵyndarymen kezdesip, qalanyń qalpyna keltiriletinine ýáde berdi.
Sondai-aq Elbasy Nursultan Nazarbaev Arystaǵy jaǵdaiǵa alańdaýshylyq bildirdi. Tuńǵysh Prezidenttiń tóraǵalyǵymen Qaýipsizdik keńesiniń otyrysy ótip, onda Arys qalasyndaǵy ahýal talqylandy.
Úkimet otyrysynda Premer-Ministr Asqar Mamin jarylys saldarynan kóz jumǵandardyń týǵan-týystaryna kóńil aityp, turǵyndarǵa barlyq kómek kórsetiletinin aitty. Keltirilgen zalaldyń kólemi baǵalanyp, Úkimet rezervinen aqsha bólinedi.
Evakýatsiialaý kezinde myńnan astam ata-ana balarynan kóz jazyp qaldy. Sábilerdiń barlyǵy týys-týǵandaryna din-aman tapsyryldy.
