ارىستاعى جارىلىسقا قاتىستى ەسكەري بٶلٸمنٸڭ كومانديرٸ مەن ونىڭ ورىنباسارى قاماۋعا الىندى, دەپ حابارلايدى "ۇلت اقپارات" ٸشكٸ ٸستەر مينيسترلٸگٸنٸڭ باسپاسٶز قىزمەتٸنە سٸلتەمە جاساپ.
«2019 جىلدىڭ 23 تامىزىندا ٸٸم تەرگەۋ دەپارتامەنتٸنٸڭ قىلمىستىق ٸستەر جٶنٸندەگٸ ەسكەري-تەرگەۋ باسقارماسىمەن ارىس قالاسىنداعى ارسەنالدىڭ جارىلۋ فاكتٸسٸ بويىنشا ەسكەري بٶلٸمنٸڭ كومانديرٸ مەن ونىڭ ورىنباسارى – ارتيللەرييالىق قارۋ-جاراق ساقتاۋ بازاسىنىڭ باستىعى ۇستالدى», - دەلٸنگەن ٸٸم حابارلاماسىندا.
ۇستالعان كٷدٸكتٸلەر قر قك 462-بابى 3-بٶلٸگٸندە قاراستىرىلعان (جارىلعىش زاتتاردى ۇستاۋ ەرەجەلەرٸن بۇزۋ), 453-بابى 2بٶلٸگٸ (اۋىر زارداپقا اپارىپ سوققان نەمقۇرايلىلىق) بويىنشا قاماۋعا الىنعان.
«بٷگٸن تٷركٸستان وبلىسى ارىس اۋداندىق سوتىمەن اتالعان ادامداردى 2 ايعا «قاماۋعا الۋ» شاراسى قابىلداندى. سوتقا دەيٸنگٸ تەرگەۋ جٷرگٸزٸلٸپ جاتىر», - دەدٸ ٸٸم.
ەسكە سالا كەتسەك, ارىس قالاسىنداعى ەسكەري بٶلٸمنٸڭ قويماسىندا 24 ماۋسىم كٷنٸ تاڭەرتەڭ جارىلىس بولدى. سالدارىنان ٷش ادام قازا تاپتى - ارىس تۇرعىنى مەن ەكٸ ەسكەري قىزمەتشٸ. 170-كە جۋىق ادام زارداپ شەكتٸ. 20-عا جۋىق ٷي, 9 قورا-قوپسى جانىپ, دالالى اۋماقتا 14 وشاق تۇتاندى. ٷي-جايلار مەن عيماراتتاردىڭ 80-90 پايىزىنا ەرتٷرلٸ دەڭگەيدە زاقىم كەلدٸ. بٸرقاتار ٶڭٸردە شۇعىل جەلٸلەر قۇرىلدى.
تٷركٸستان وبلىسىنا ارنايى بارعان قازاقستان پرەزيدەنتٸ قاسىم-جومارت توقاەۆ ارىستاعى ەسكەري بٶلٸمشەدەگٸ وق-دەرٸ قويماسىنداعى جارىلىستان زارداپ شەككەن قالا تۇرعىندارىمەن كەزدەسٸپ, قالانىڭ قالپىنا كەلتٸرٸلەتٸنٸنە ۋەدە بەردٸ.
سونداي-اق ەلباسى نۇرسۇلتان نازارباەۆ ارىستاعى جاعدايعا الاڭداۋشىلىق بٸلدٸردٸ. تۇڭعىش پرەزيدەنتتٸڭ تٶراعالىعىمەن قاۋٸپسٸزدٸك كەڭەسٸنٸڭ وتىرىسى ٶتٸپ, وندا ارىس قالاسىنداعى احۋال تالقىلاندى.
ٷكٸمەت وتىرىسىندا پرەمەر-مينيستر اسقار مامين جارىلىس سالدارىنان كٶز جۇمعانداردىڭ تۋعان-تۋىستارىنا كٶڭٸل ايتىپ, تۇرعىندارعا بارلىق كٶمەك كٶرسەتٸلەتٸنٸن ايتتى. كەلتٸرٸلگەن زالالدىڭ كٶلەمٸ باعالانىپ, ٷكٸمەت رەزەرۆٸنەن اقشا بٶلٸنەدٸ.
ەۆاكۋاتسييالاۋ كەزٸندە مىڭنان استام اتا-انا بالارىنان كٶز جازىپ قالدى. سەبيلەردٸڭ بارلىعى تۋىس-تۋعاندارىنا دٸن-امان تاپسىرىلدى.
