Túrkistan oblysynda qyz alyp qashý deregi boiynsha politseiler sotqa deiingi tergep-tekserý amaldaryn júrgizýde, dep habarlaidy "Ult aqparat" oblystyq politsiia departamentine silteme jasap.
Eske sala keteiik, áleýmettik jelilerde bir top jas jigitterdiń qyzdy kólikke májbúrlep otyrǵyzyp, kúshpen alyp qashý oqiǵasy beinelengen video taraǵan bolatyn.
«Videony teksergen politseiler oqiǵa Túrkistan oblysynyń Arys qalasynda oryn alǵanyn anyqtady. Qyzdyń anasy politseilerge aryzdanǵan. Qazirgi tańda qyz óziniń úiine, ata-anasyna oralǵan. Kúdiktiniń aitýynsha, olar buryn bir synypta oqyǵan jáne qyzdy úilený maqsatynda alyp qashqan» delingen habarlamada.
Atalǵan derek negizinde QR QK 125-baby «Adam urlaý» boiynsha is qozǵaldy. Qazirgi tańda sotqa deiingi tergeý amaldary júrgizilýde. Politseiler bolǵan jaǵdaidyń barlyq mán-jaiyn anyqtaýda.
