Arysta jumystardy uiymdastyrýǵa el arasynan shyqqan belsendiler atsalysýda. Bul týraly oblystyq Ishki saiasat jáne din qyzmeti basqarmasynyń basshysy Beisen Tájibaev óziniń Feisbýk áleýmettik jelisindegi paraqshasynda jazdy, dep habarlaidy "Ult aqparat"
Beisen Tájibaevtyń aitýynsha, turǵyndar arasynan árbir 10 úige 1 belsendi jetekshi sailanyp, elmen tyǵyz qarym-qatynas ornatyla bastaǵan.
«Shtabtarda +40 ystyq pen alatopan shańǵa qaramastan qyzý qarbalas. Arystaǵy 17 sektorǵa bólingen aýmaqtarda tynym taptyrmaityn jumystar júrýde. Onyń barlyǵyn shtabqa jetekshilikke kirisken Ulasbek Sádibekovpen aralap, naqty baǵyttardy belgiledik. Árbir oblys pen aýdandar bekitilgen shtabtarda 2 baǵytta iske kiristi. Birinshiden, zardap shekken úilerdi baǵalaý, esepteý qolǵa alyndy. Soǵan sai jóndeletin bolady. Ekinshiden, turǵyndar arasynan árbir 10 úige 1 belsendi jetekshi sailap, elmen tyǵyz qarym-qatynas jasaýǵa kóshemiz. Bul xalyqtyń osyndai jaǵdaida ózin-ózi basqarýyna múmkindik beredi. Eń bastysy ashyqtyqty qamtamasyz etip, eldiń pikirin estip, sheshim qabyldaýǵa tikelei septigin tigizedi» delingen paraqshada.
Oblystyq Ishki saiasat jáne din qyzmeti basqarmasynyń basshysy sondai-aq, el arasynan jetekshi ókilder belgilenip jatqanyn jetkizdi.
«Máselen, Keles aýdany jaýapty N12 sektorǵa 624 otbasy ense, endi solardyń arasynan 62 jetekshi ókil belgilendi. Azyq-túlik taratý, úilerge baǵalaý júrgizý osy jetekshilerdi qatystyra otyryp iske asady. Arys boiynsha 700-dei belsendi ókil belgilenip, jaýapkershilikti arqalap, shtabtarmen birlesken áreketke kóshedi. Árine, tapsyrylǵan isti tolyq túsinbei nemese tájiribesi jetpei jatqandary da bar. Bastysy jergilikti atqarýshy biliktiń ókilderi turǵyndarmen til tabysýǵa, týyndaǵan ortaq problemalardy sheshýge umtylýda. Munyń nátijesin kóretin kún de alys emes», - deidi Beisen Tájibaev.
