Túrkistan oblysy, Arys qalasynda jumyspen qamtý jáne áleýmettik baǵdarlamalar bóliminiń alty qyzmetkeri sottaldy. Olarǵa pandemiia kezindegi tótenshe jaǵdai men shekteý sharalaryna bailanysty azyq-túlik pen turmystyq qajettilikke bólingen qarajatty jymqyrdy degen aiyp taǵyldy, dep habarlaidy QazAqparat.
Arys aýdandyq soty baspasóz qyzmetiniń málimetinshe, aiyptalǵan altaýdyń qatarynda qalalyq jumyspen qamtý jáne áleýmettik baǵdarlamalar bóliminiń basshysy men onyń orynbasary, kómek sektorynyń bas mamany men esepshisi jáne onyń eki kómekshisi bar. Olar turmysy tómen turǵyndarǵa bólingen 120 mln teńgeni talan-tarajǵa salǵany úshin sottaldy. Sot otyrysynda sheneýnikterdiń pandemiia kezinde 29 azamatqa kómek retinde bólingen 2 900 400 teńgeni zańsyz aýdaryp alǵany anyqtalǵan.
«Kóbinshe ózderiniń týystary men tanystarynan turatyn Arys qalasynyń 138 azamatyna aqshalardy negizsiz, zańsyz aýdarǵany anyqtalǵan. Memleketke jalpy somasy 123 493 688 teńge materialdyq zalal keltirgen», delingen sottyń habarlamasynda.
Sot úkimine sáikes bólim basshysy men onyń orynbasaryna Qylmystyq kodekstiń 189-baby 4-bóligi 2-tarmaǵy «Asa iri mólsherdegi senip tapsyrylǵan bóten múlikti iemdenip alý nemese talan-tarajǵa salý» boiynsha kináli dep tanylyp, 7 jyl merzimge bas bostandyǵynan aiyrý jazasy taǵaiyndaldy. Olarǵa ómir boiyna memlekettik qyzmette eńbek etýge tyiym salyndy. Sondai-aq, bólimniń bas mamany úsh bap boiynsha kináli dep tanyldy. Al, esepshiniń kómekshisi 189-baby 4-bóligi 2-tarmaǵy, 28-baby 5-bóligi, 190-baby 3-bóliginiń 2,4-tarmaqtary boiynsha kináli dep tanylyp, 7 jylǵa bas bostandyǵynan aiyryldy.
«Sonymen birge, is boiynsha azamattyq talap qoiý aryzy ishinara qanaǵattandyrylyp, sottalýshylardan memleket paidasyna ortaq tártippen jalpy somasy 113 788 348 teńge (qalǵan somalar tólenip qaitarylǵan) keltirilgen zalal men osynyń 3 paiyzy kóleminde memlekettik baj óndirildi» - delingen habarlamada.
Dese de esepshiniń kómekshisi qyzmetin atqarǵan aiyptalýshy Qylmystyq kodekstiń 74-baby 1-bóligine sáikes, iaǵni júkti nemese jas balalary bolýyna bailanysty jazasyn tek 5 jyldan keiin óteitin boldy. Al, oǵan deiin probatsiialyq esepte turady. Sonymen qatar, esepshiniń taǵy bir kómekshisi men bólimniń kómek sektorynyń bas mamany da Qylmystyq kodekstiń 189-baby 4-bóligi 2-tarmaǵymen kináli dep tanyldy. Onyń birine 7, bireýine 2 jyl bas bostandyǵynan aiyrý jazasy taǵaiyndaldy. Olar da jazasyn bes jyldan keiin óteitin boldy. Jumyspen qamtý bóliminiń basshysy, orynbasary jáne esepshi jazalaryn qaýipsizdigi ortasha túzeý mekemesinde óteidi. Aita keteiik, sot úkimi áli zańdy kúshine engen joq.
