Arys qalasyndaǵy tótenshe jaǵdaidy paidalanyp, bir úi men dúkendi tonaǵan úsh adam ustaldy, – dep habarlaidy "Ult aqparat".
«Oqiǵa ornynda oblystyq jedel shtab quryldy. Jedel jeli iske qosylyp, oǵan osy ýaqytqa deiin 11 myńǵa jýyq qońyraý kelip tústi. Qazirgi ýaqytta urlyq-qarlyqtyń aldyn alý úshin politsiianyń 75 nariady oqiǵa ornynda jumys júrgizýde. Sonymen qatar, eki qylmysty jasaǵan úsh adam ustaldy. Atap aitqanda, bir dúken men bir úi tonalǵan» dedi Ishki ister ministri Erlan Turǵymbaev Úkimet otyrysynda.
Ministrdiń aitýyna qaraǵanda, Arys qalasyna kirgen jáne shyqqan kólikterdiń barlyǵy tekserilip jatyr.
«Tótenshe jaǵdaidyń saldarynan eki adam kóz jumdy. Biri Arys qalasynyń áskeri bóliminiń áskeri qyzmetshisi, ekinshisi Arys qalasynyń turǵyny. Eki adam jansaqtaý bóliminde jatyr. 34 adam aýrýhanaǵa jatqyzyldy. Jeńil jaraqat alǵan 12 adamǵa meditsinalyq kómek kórsetildi» dedi ol.
Eske sala ketsek, Arys qalasyndaǵy áskeri bólimniń qoimasynda keshe tańerteń jarylys bolǵandyǵy týraly habarlaǵan bolatynbyz. Apat saldarynan eki adam mert boldy. Túrkistan oblysyna arnaiy barǵan Qazaqstan Prezidenti Qasym-Jomart Toqaev Arystaǵy áskeri bólimshedegi oq-dári qoimasyndaǵy jarylystan zardap shekken qala turǵyndarymen kezdesip, qalanyń qalpyna keltiriletinine ýáde berdi.
