QR Qorǵanys ministri Nurlan Ermekbaev Arys qalasynyń jai-kúiin baiandady, dep habarlaidy QazAqparat.
Eń aldymen ministr jarylystan qaza tapqan turǵynnyń jaqyndaryna kóńil aitty.
«Qaza tapqan kisiniń jaqyn týystaryna jáne jaraqat alǵandarǵa kóńil aitamyz. Búgin Arys qalasynda áskeri oq-dáriler arsenaly qoimalarynyń birinde órt shyǵyp, jarylys boldy. Jarylys basqa qoimalarǵa jalǵasty, sondyqtan birneshe qoima jarylyp ketti. Óńir ákimdigi pen TJ komitetiniń is-áreketiniń arqasynda eldi mekenderden barlyq turǵyndar shyǵaryldy», - dedi ministr Arys qalasynda tikelei efirde ótken brifingte.
Sonymen birge, N. Ermekbaev arsenalda qaýipti oq-dárilerdiń saqtalmaǵanyn jetkizdi.
«Bul arsenalda qaýipti oq-dáriler men bombalardyń saqtalmaǵanyn resmi málimdeimin. Barlyq oq-dáriler saqtyq úshin dalaǵa qarai baǵyttalyp qoiylǵan jáne negizgi soqqy tolqyny dalaǵa qarai júrdi. Tolqynnyń bir bóligi eldi mekenge áser etip, birneshe baspananyń shatyry men terezesine zaqym keldi. Qaýipsizdik úshin Arys turǵyndarynan jaqyn arada jedel shtabtyń ruqsatynsyz úilerine kelmeýdi suraimyz. Sebebi Arystyń kóshelerinde jarylmai qalǵan oq-dáriler bolýy múmkin. Qazir bir top saper tazalaý jumystaryn júrgizip jatyr. Bul jumystar aiaqtalǵan soń, turǵyndar óz úilerine orala alady. Qazir barlyq úiler men kvartaldar politsiia men qarýly kúshterdiń jiti baqylaýynda. Sondyqtan múliktiń saqtalýy jóninde turǵyndar ýaqymdamaǵany jón. Eshqandai tonaýshylyq pen urlyq-qarlyq bolmaidy», - dedi Qorǵanys ministri.
