Foto: panthermedia/vostock-photo
Arysta 5 jasar qyzǵa seksýaldyq sipattaǵy qylmystyq áreket jasaǵan pedofil isine sot núkte qoidy, dep habarlaidy Otyrar.kz portaly.
Is Túrkistan oblysynyń qylmystyq ister jónindegi mamandandyrylǵan aýdanaralyq sotynda qaraldy. Aiyptalýshyǵa Qylmystyq kodekstiń 121-baby 4-bóligimen aiyp taǵyldy.
Sot materialdaryna súiensek, 2001 jyly dúniege kelgen sottalýshy - Arys qalasynda ornalasqan №37 úidiń turǵyny. Ol óziniń páterinen shyǵyp, №39 mekenjaida ornalasqan kópqabatty turǵyn úidiń aldyna kelgen. 1-shi syrtqy esiktiń kireberisinde (podezd) 5 jasar qyzdyń jalǵyz oinap júrgenin kórip, seksýaldyq sipattaǵy zorlyq-zombylyq is-áreketterin jasaý qylmystyq piǵyly paida bolǵan. Sodan kópqabatty turǵyn úidiń baspaldaq dálizine kirip, búldirshindi qolynan jetektep 2-shi qabattan 3-shi qabatqa kóteriletin baspaldaqtyń orta bóligindegi alańshaǵa alyp baryp, eshkimniń joq ekenine kóz jetkizgen. Keiin kishkentai qyzǵa seksýaldyq sipattaǵy qylmystyq áreketin jasaǵan.
Sot otyrysynda sottalýshy óz kinásin tolyq moiyndaǵan jáne oqiǵa bolǵan kezde ishine «jyn kirip ketti» dep jaýap bergen.
«Sot úkimimen sottalýshy kináli dep tanylyp, oǵan 20 jylǵa bas bostandyǵynan aiyrý jazasy taǵaiyndaldy. Jazany qylmystyq-atqarý júiesiniń qaýipsizdigi ortasha mekemesinde óteitin bolady. Sonymen qatar sottalýshy pedagogikalyq jáne kámeletke tolmaǵandarmen jumys isteýge bailanysty qyzmetpen ainalysý quqyǵynan ómir boiyna aiyryldy. Úkim zańdy kúshine engen joq» - delingen Túrkistan oblystyq sotynyń málimetinde.
Eske salsaq, kóptiń jaǵasyn ustatqan oqiǵa biyl mamyr aiynyń 21-i kúndizgi ýaqytta bolǵan. Aram piǵylyn iske asyrǵan soń jas jigit kópqabatty úidiń podezinen shyǵyp, temeki satyp alý úshin dúkenge barǵan. Al búldirshinniń ákesi kópqabatty úidiń aldynda óz kóligin jóndep jatqan. Osy kezde jas qyz ákesine bolǵan oqiǵa men tamaǵy aýyryp jatqanyn aitqan.
Kúdikti sol ýaqytta ustalyp, dereý qamaýǵa alyndy.
