Arysta kólik júrgizýshisi velospedpen ketip bara jatqan 12 jastaǵy balany qaǵyp ketip, oqiǵa ornynan boi tasalaǵan. Atalmysh jait boiynsha politsiia bóliminen birden jedel tergeý toby qurylyp, jedel ýákilder men patrýldik politsiia toby oqiǵa bolǵan jerge jetken, dep habarlaidy "Ult aqparat".
Túrkistan oblystyq PD baspasóz qyzmetiniń málimetinshe, osy keleńsiz jaǵdai boiynsha jergilikti turǵynnyń biri politsiiaǵa aryz túsirgen. Oqiǵa ornyna jedel jetken jedel ýákil, politsiia leitenanty Ermek Eralyuly men JPQ PP tobynyń qyzmet aǵa inspektory Bahytjan Shekerbekov, qyzmet inspektory Bibarys Tájen tez arada izdestirý sharalaryn júrgizdi. Qala ishindegi beinekameralardyń jazbalaryn tekserip, kýágerlerden suraq jaýaptar alyndy. Osylaisha shamamen 2-3 saǵattyń kóleminde velosipedshini qaǵyp ketken kúdikti ustaldy. Tártip saqshylary seziktiniń kóligin tintý kezinde sómkede turǵan kúmándi zatty baiqap, tekserý júrgizedi. Nátijesinde, paketke salynǵan hosh iisi bar, jasyl tústi marihýanaǵa uqsas shóp pen prikýrsordy, qoldanýǵa tyiym salynǵan esirtki tektes birneshe preparattardy taýyp, tárkileidi. Keiinnen anyqtalǵandai, kúdikti Arys qalasyna qurylys jumystaryna kelgen Shymkent turǵyny bolyp shyqty.
«Búgingi tańda atalmysh jaitqa bailanysty Arys APB-niń politseileri QR Qylmystyq kodeksiniń 296-baby «Esirtki, psihotroptyq zattarmen, sol tektestermen, prekýrsorlarmen ótkizý maqsatynsyz zańsyz jumys isteý» boiynsha tergep-tekserý amaldaryn júrgizýde. Saraptamalar taǵaiyndaldy», delingen habarlamada.
