Arys halqynyń basyna túsken qiyn jaǵdaiǵa alańdaýshylyq bildirgen el azamattary barynsha kómek qolyn sozýda. Elimizdiń barlyq óńirnen gýmanitarlyq kómek kelip jatyr, dep habarlady Túrkistan oblysy ákiminiń baspasóz qyzmeti.
Qazirgi tańda Qaraǵandy, Qyzylorda, Jambyl oblystary men Almatydaǵy otandastarymyzdyń jibergen túrli materialdyq zattary Shymkent qalasy, Yntymaq shaǵynaýdanyndaǵy saýda-logistikalyq ortalyǵy men «Nursát» shaǵynaýdanyndaǵy «Kórme» ortalyǵyna jetkizilgen.
Búgin saýda-logistikalyq ortalyǵyna Jambyl oblysynan 36 tonna azyq-túlik taýarlary men jeke tazalyqqa arnalǵan zattar keldi. Atap aitqanda, 18 myń tonna birinshi sanattaǵy jumyrtqa, 10 tonna un, 1300 dana nan, 10 tonna qant, 2000 litr sút jəne t.b. jetkizildi.
Sondai-aq Shymkenttegi qoimaǵa Almatydan da qaiyrymdylyq kómek kelip jetti. Qajetti azyq-túlikter men gigienalyq zattardy Almaty qalasynyń turǵyndary joldaǵan.
Sonymen qatar, keshe túnde Qyzylorda oblysynan birneshe gýmanitarlyq júk tiegen fýralar kelgen bolatyn. Aldaǵy ýaqytta basqa da óńirlerden kómek júkteri keledi dep kútilýde. Qazir Túrkistan oblysy men Shymkent qalasy mektepterinde ornalasqan evakýatsiialyq beketterde qajetti azyq pen zattar jetkizilýde.
Arystyq azamattarǵa qaiyrymdylyq kómek retinde Shymkent qalasyndaǵy №№54, 56, 87 mektepterde ornalasqan evakýatsiialyq pýnktterine qajetti azyq-túlik pen jeke bastyń tazalyq zattary jiberildi.
Arystyqtar úshin materialdyq jáne gýmanitarlyq kómekterdi qabyldaityn beketter táýlik boiyna jumys isteidi.
Aita keteiik, Túrkistan oblysynda «Túrkistan» korporativtik áleýmettik damý qorynda arnaiy esep-shot ashylǵan bolatyn. Búginde qorǵa túsken qarjy kólemi 600 mln teńgege jetti.
