Qorǵanys ministrliginiń bólimsheleri Arys qalasyn jarylǵysh zattardan tolyq tazartty, dep habarlaidy "Ult aqparat" vedomstvonyń baspasóz qyzmetine silteme jasap.
«Qorǵanys ministri Nurlan Ermekbaev Túrkistan oblysynyń ákimi Ómirzaq Shókeevpen birge qalanyń 17 sektoryndaǵy jedel shtabtardy aralap, halyqtyń suraqtaryna jaýap berdi. Jarylý qaýpi bar zattardan jappai tazartý úshin Arys aýmaǵy 17 sektorǵa bólingen. Tańǵy saǵat 05.00-de tazartylǵan ýchaskelerge baqylaý júrgizildi. Aýmaqty tazalaý aiaqtalǵan soń Arys-1 jáne Arys-2 stansylarynan barlyq baǵyttaǵy poiyzdardyń qozǵalysy qalpyna keltirildi», - delingen ministrliktiń habarlamasynda.
Baspasóz qyzmetiniń málimetine súiensek, QR Qarýly Kúshteriniń radiatsiialyq, himiialyq jáne biologiialyq barlaý toptary qalanyń radiatsiialyq, biologiialyq jaǵdaiyna tolyq monitoring júrgizgen. Radiatsiialyq fondy ólsheý kezinde ýly jáne keri áser etetin zattar tabylmaǵan.
«Degenmen, qala aýmaǵynda saperler jasaǵy áli bolady. Sondai-aq áýeden turaqty baqylaý ornatylyp, áskeri qoima aýmaǵy men oǵan irgeles jerlerge monitoring júrgiziledi. Olardan jetken aqparat jedel shtabqa túsip otyrady. Endi Qarýly Kúshterdiń jeke quramy Arys turǵyndaryna óz úilerine qaita oralýǵa kómektesedi. Áskeri psihologtar da elmen jumys istep, konsýltatsiialar ótkizedi», - delingen baspasóz málimetinde
