Túrkistan oblysynyń politseileri tyiym salynǵan materialdardy taratqan kúdiktini ustady, dep habarlaidy QazAqparat.
Túrkistan oblysy PD ekstremizmge qarsy is-qimyl basqarmasynyń qyzmetkerleri dini-ekstremistik baǵyttaǵy ideologiiany nasihattaityn tyiym salynǵan materialdardyń internette taralýynyń kezekti jaityn anyqtap, onyń jolyn kesti.
Bul týraly oblystyq politsiia departamenti bastyǵynyń orynbasary, politsiia podpolkovnigi Qurmanbek Sahov jetkizdi.
«Áleýmettik jelilerge monitoring júrgizý kezinde Facebook paraqshalarynyń birinen belgisiz adamdardyń tyiym salynǵan dini-ekstremistik uiymnyń ideologiiasyn nasihattaityn beinerolikter men mátindik habarlamalar jariialaǵanyn anyqtady.
Atalǵan materialdar departamentte tirkelip, saraptamaǵa joldandy. Nátijesinde sarapshylar bul materialdarda terrorizm men ekstremizmdi nasihattaýdyń belgileri bar ekenin rastady. Osyǵan bailanysty biz QR QK 256 -baby 2-bóligimen sotqa deiingi tergeýdi bastadyq.
Tekserý aiasynda Túrkistan oblysy PD Ekstremizmge qarsy is-qimyl basqarmasynyń jedel ýákilderi men Túrkistan oblysy boiynsha UQKD birlesip, jedel-izdestirý is-sharalary nátijesinde kúdikti retinde Arys aýdanynyń turǵynyn ustadyq. Ustalǵan er adamnyń buryn destrýktivti-dini aǵymnyń jaqtaýshysy jáne sotty bolǵanyn anyqtadyq.
Onyń úiin tintý kezinde biz ártúrli kompiýterlik tehnikany, tyiym salynǵan dini ádebietter, uialy telefon men diskilerdi tárkiledik. Qazirgi ýaqytta sotqa deiingi tergeý amaldary júrgizilýde. Kúdikti qamaýǵa alyndy. Búginde istiń mán-jaiy jan-jaqty anyqtalyp jatyr», - dep atap ótti politsiia podpolkovnigi Qurmanbek Sahov.
Óz kezeginde Túrkistan oblysynyń politseileri azamattarǵa QR zańnamasymen tyiym salynǵan dini-ekstremistik baǵyttaǵy materialdardy, onyń ishinde áleýmettik jelilerde taratqany úshin qylmystyq jaýapkershilik qarastyrylǵanyn eskertedi.
Eger sizde osyndai quqyq buzýshylyqtar týraly qandai da bir aqparat bolsa, tez arada politsiianyń 102 nómirine habarlasyńyz.
